Alcoap pilersaarutaa nunatsinnut iluaqutaassaaq
Washingtonimi Joint Committee-mi ataatsimiinnermi Alcoap pilersaarutaa suleqatigiinnermi naammassisat iluatsilluarnerpaartarigaat isumaqatigiissutigineqarpoq.
Joint Committee-mi ataatsimiinneq Washingtonimi pingasunngormat ullaakkut ammarneqarmat Alcoap pilersaarutaa kalaallit nunaata aningaasaqarnikkut imminut napatinnerulernissaanik politikkianut iluaqutaasussaasoq peqataasunit amerlanerussuteqarluarnit isumaqatigiissutigineqarpoq.
Inuiaqatigiit tamarmik kalaallillu innuttaasa tamanna iluaqutigissavaat, taamak New York-imi Alcoa Global Primary Products-imi pisortaq Kenneth Wisnoski oqarpoq. Alcoa nunani assigiinngitsuni suliffeqarfissuaatiliunngilaq, Kalaallit Nunaannukariarluni sinneqartoorutiminik nunamiit annissuiinnarniartoq, arlaannaannilluunniit qimataqarani, Kenneth oqarpoq.
Pilersaarutaavoq aatsitsivittavia 600-t missaannik sulisoqassasoq, taavalu peqatigitillugu aatsitsivimmut attuumassuteqartunik 1200-t 1800-llu akornanni amerlassuseqartut saniatigut inuiaqatigiinni sulisorineqassasut, Wisnoksi erseqqissaavoq, nangillunilu oqaatigalugu pilersaarut tamarmiusoq aqqusinernut, atuarfinnut, napparsimmavinnut assigisaannullu nutaanik aningaasalersuiffiussasoq, kalaallit nunaanni innuttaasunut tamanut iluaqutaassalluni.
USA-p aallartitaata James P. Cain-ip amerikamiut peqataatitaannut aqutsisuusup erseqqissarpaa, Kalaallit Nunaat suleqatigisassamik Alcoatut pitsaatigisumik allamik peqanngitsoq. Aamma qallunaat aallartitaasa aqutsisuat nunanut allanut siunnersorti naalagaaffiullu sinniisaa Michael Zilmer-Johns isumaqarpoq, Alcoap pilersaarutaa Kalaallit Nunaannut iluaqutaassasoq.
Brenda Pierce-p US Geoloigical Survey-meersup olieqarferujussuit gas-eqarferujussuillu Kalaallit Nunaata Kangiata avannaaniittut saqqummiuppai.
Misissueqqissaarnerup takutippaa Kalaallit Nunaanni olie-qarneranut gas-eqarneranullu USA qanoq soqutiginnitsiginersoq. Brenda Pierce-o erseqqissarpaa, nunap ilusaanut sananeqaataanullu tunngatillugu immap naqqata qanoq innera ilisimaneqartoq, periarfissallu suunersut, alloriarnerit tullerissavaat olie-siorluni gas-isiorlunilu qillerinissat, ataatsimiinnermi Pierce oqarpoq.
Naalakkersuisunut ilaasortap Aleqa Hammondip ataatsimiinnermi kalaallinut USA-mi ilinniartunut aningaasaateqarfinnik pilersitsisoqarnissaa pingaartillugu oqaatigaa,
- Ulluni makkunani nunarsuarmioqatigiit qanilliartuinnarneranni Kalaallit Nunaanni inuit nunani assigiinngitsuni sulinermik isiginnittaasillit pisariaqartinneqartut, Joint Committee-mi ataatsimiinneq ullumi aallartimmat oqarpoq.