Aleqa aningaasamut inatsimmut sunniuteqaqataavoq
Aningaasanut inatsisissamut isumaqatiginninniartoqarnerani folketingimi ilaasortat Aleqa Hammond aamma Aaja Chemnitz Larsen danskit aningaasaqarnermut ministeriat Kristian Jensen ataatsimeeqatigaat
- Ataatsimut isigalugu naalakkersuisut Folketingimi Atlantikup Avannaani sinniisunut pitsaasumik attaveqarneq takutippaat. Kalaallit sinniisaat tusarnaarneqarput, qinigaaffiullu ingerlanerani Kalaallit Nunaanni eqqartuussiveqarneq, aningaasaliissutit, kulturi aamma aningaasaliinerit malitseqartinneqarsimapput. Oqaloqatigiinnerit angusaqarfiulluarput eqqortup tungaanut ingerlanissamik tikkuussisut, tusagassiutinut nalunaarummi Aleqa Hammond oqarpoq.
- Naalakkersuisut naalakkersuinermi tunngavissakkut imminnut pisussaaffilernikuupput, Kalaallit Nunaanni eqqartuussiveqarneq Danmarkimisut qaffasissuseqassasoq. Maannamut aningaasanut inatsisikkut aningaasaliissutigineqarsimasut anguniakkamik tamatuminnga angusaqarnissamut naammanngillat.
- Inatsiseqarneq sukumiisumik misissorneqartariaqarpoq. Soorlu assersuutigalugu kommunefogedinut tunngavissat pingaarutillit, pisortat pinerluuteqarsimasunut inissiiviisa unnuisarfiutaasalu isumannaarneqarnissaat amigaataapput, minnerunngitsumillu Kalaallit Nunaanni illersuisoqarnermi atuuffiup tungaatigut aningaasaqarnikkut naammattumik tunngavissat, nangilluni oqarpoq.
Naalagaaffeqatigiit akimorlugit ilisimasat nukittorsarnissaannut 2022-p tungaanut 30 mio. kruuninik aningaasaliisoqarsimavoq. Aleqa Hammond tassunga ima oqaaseqarpoq:
- Tamanna pitsaasutut nalilerpara, ataatsimut oqaluttuarisaaqatigiinnitsinnik aamma kulturitsinnik assigiinngitsunik meeqqat inuusuttullu Naalagaaffeqatigiit pillugit ilisimasaannik nukittorsaaqataasinnaasutut nalilerpara. Tamanna kattuffiit arlallit Naalagaaffeqatigiinnerup atuartitsissutigineqartarnissaanik kissaateqarnermut atavoq, Aleqa Hammond tusagassiutinut nalunaarummi oqarpoq.