Aleqa: Nukissiorfiit aktienik piginneqatigiiffiussaaq
Naalakkersuisut nukissiorfiup piginneqatigiiffup allanngortinneqarnissaa siunnersuutigilersaarpaat. Taamaaliornikkut nunatta karsia 2009-mi 234 millioner kronenik sipaassaaq.
– Nukissiorfiit 2009-mi januaarip 1-iani allanngortereerneqarneratigut aningaasaqarnermut inatsisissat pisariaqartitanik 230 millioner kronenik sinneqartooruteqarnissaanik qularnaarinnissaaq, aningaasaqarnermut naalakkersuisoq Aleqa Hammond (Siumut) oqarpoq.
Nukissiorfik sanaartornernut ullumikkut ukiumut 200 aamma 300 millioner kronet akornanni nunatta karsianit atorniartarpoq, ukiumut seks procentinik ernialerlugit.
Piginneqatigiiffiup atukkani 800 millioner kroneusut (1/1-2007-imi) ukiumut erniai ilanngullugit 200 millioner kronenik taarsersortarpai.
Piginneqatigiiffillu 2008-p ingerlanerani nunatta karsianit atorniaqqinniarluni aalajangissappat akiitsuisa 1 milliard krone-t qaangeriaannaavai.
– Nunatta karsianit aallertarneq unittariaqarpoq. Allanngortitsinikkut nunatta karsia atorniartarfiusaarunnaassaaq, taamalu suliffeqarfiup siunissami sanaartugassanik nammineq sinneqartoorutiminik imaluunniit aktienik piginneqatigiiffuttut allatulli aningaaserivinnut atorniartalertariaqassaaq, Aleqa Hammond erseqqissaavoq.
Sermitsiami tallimanngornermi saqqummersussami aamma atuaruk.