- Aleqa, pissusiviusut paasiniakkit mamarliiniarnerillu unitsiguk

- Tamanna inuttut saassussineruvoq, piviusunik tunngaveqanngitsoq.

- Piviusoq tassaavoq ”aatsitassarsiorfiutileqatigiiffik”, tassalu Greengems ApS, Aleqa Hammondip innersuussutigisaa, aatsitassarsiorfimmik ingerlatsinissamut akuersissummik peqarnikuunngisaannarmat.

- Ingerlatseqatigiiffik nalinginnaasumik misissuinissamut akuersissummik, inuinnaat misissuinissaat siunertaralugu tunniunneqartartorpassuit ilaannik, peqarsimavoq. Akuersissut 2011-imi decembarimi utertinneqarpoq – tassalu ukiup ataatsip missaata qangiutereerneranili.

- Aleqa – pissusiviusut paasiniakkit mamarliiniarnerillu unitsiguk.

Taamak erseqqitsigisumik Naalakkersuisut siulittaasuata tullia Jens B. Frederiksen, Demokraatit oqaaseqarpoq.

Tamanna pivoq ataasinngornermi Sermitsiaq.AG'mi allaaserigatsigu qanoq Siumut siulittaasua Aleqa Hammond Facebookimini allammat:

"Naalakkersuisut siulittaasuata nulia aammalu aatsitassanut naalakkersuisup nulia qanoq nuannartigissappat Sualissanut Angisoorsuarnut inatsisissap tuaviuunneqarneranut - qinersisoqannginnerani. Allamik oqarfiunngilaq, ilami taakkua aatsitassarsiorfinnk ingerlatsimmata."

Tassani Hammondip innersuutigaa Aviâja Vandersee Kleist aamma Grethe Kramer Berthelsen piginneqatigiiffimmi Greengems-imut attuumassuteqarnerat, taakkua Nuup eqqaani mineralinik ujaqqanillu erlinnartunik ujaasinermik ingerlatsipput. Siumup siulittaasua naapertorlugu taakkua iluanaaruteqarujussuartussaapput aatsitassarsiornermik ingerlatsilerunik.

Suut tamarmik inatsisit aallaavigalugit ingerlanneqarput
Aleqa Hammondip Greengems pillugit tunngavissaqanngitsumik oqaaseqaatai Jens B. Frederiksenimit tunuartinneqarput.

- Naalakkersuisut Siulittaasuanut tullersortitut 2009-mi Naalakkersuisut isummernissaannut tunngavissiaq taanna akuersinissamik inassuteqaatitaqartoq nammineerlunga atsiorpara. Naalakkersuisut Siulittaasuat kiisalu Inuussutissarsiornermut Aatsitassanullu Naalakkersuisoq suliami attuumassuteqarnerminnik nalunaaruteqarsimammata, tamanna Namminersorlutik Oqartussat Inatsisilerinermut allaffianni malittarisassiarineqartunut naapertuuttumik pivoq. Tamanna aamma pissutigalugu misissuinissamut akuersissummik tunniussinissaq pillugu Naalakkersuisut aalajangiinerannut taakkua arlaannaalluunniit peqataanngillat.

- Aamma oqaatigineqarsinnaavoq arlaannaannulluunniit attuumassuteqanngitsumik misissuinermi Nuna Eqqartuussissuserisunit suliarineqartumi – kiisalu Kukkunersiuinermut Ataatsimiititaliami isumaqatigiittumi – inerniliinerni arlalinni Namminersorlutik Oqartussat iliuuseqarfiginninnerat, imaluunniit Naalakkersuisut Siulittaasuata taassumalu inooqataata, kiisalu Inuussutissarsiornermut Aatsitassanullu Naalakkersuisup taassumalu nuliata peqataanerat isornartoqartinneqanngimmata. Suut tamarmik maleruagassat atuuttut aammalu suliassaqarfimmut suliassanik suliarinnittarnermut tunngaviusut tamarmik malillugit ingerlanneqarput, Jens B. Frederiksen tikkuaavoq.

Taanna naapertorlugu Kukkunersiuinermut Ataatsimiititaliap inerniliinera Aleqa Hammondip Inatsisartunut ilaasortatut nalunngilluarpaa.

Aleqa kukkuvoq - inatsisit assigiinngitsut marluupput
- Aammalu Aleqa Hammond-ip tunngavissaqanngitsumik isornartorsiuinermini suliniutinut angisuunut inatsit aamma aatsitassarsiorfiutileqatigiiffik siusinnerusukkut taaneqartoq imminnut kaputartuuppai. Tassani eqqarsartaaseq sunaava? Suliniutinut angisuunut inatsimmi suliassat 1 mia. koruunit sinnerlugit aningaasaliinermut aningaasartuuteqarfiusartut siunnerfigineqarput. Taakkua Qeqertarsuarmi misissuinissamut akuersissummit 7 km2–itut annertussuseqartumit allaanerulluinnarput, Jens B. Frederiksen nassuiaavoq.

Aleqa Hammond Sermitsiaq.AG'mit arlaleriarluni saaffigineqartaraluarluni tutsiutinngilaq. Aaqqissuisoqarfimmit paaserusukkaluarparput Jens B. Frederiksenip qisuariaataanut qanoq isumaqarnersoq.