Aleqa: Søren Pind atorfissaqartinngilarput
Siumup siulittaasuata paasisinnaanngilaa sooq naalakkersuisut siulittaasuata ineriartortitsinermut ministeri qaaqquneraa.
- Danmarkimiit ineriartornissamut ikiorneqarnissarput pisariaqartinngilarput, nunallu inoqqaavi pillugit ICC oqaloqatigisinnaavaa. Inuiaat pisinnaatitaaffiinut eqqartuussivik naapertorlugu inuiattut akuerisaanitta kingorna tamanna Namminersorlutik Oqartussat suliassannut ilaajunnaarpoq, tusagassiuutitigut nalunaarummi Siumup siulittaasua oqarpoq.
Taama qisuariaateqarpoq naalakkersuisut siulittaasuat Kuupik Kleist nalunaaruteqareersorlu qallunaat ineriartortisinermut ministeriat nunatsinnut qaaqqusimallugu. Qisuariernini tunngavilersorpaa, aningaasanut inatsisip nutaap innuttaasorpassuarnut kinguneqarnerlussimaneranik. Aleqa Hammondip ineqarnermut akiliutit qaffannerat, inuit meeqqaminnut nerisassaqartitsinerminnut ajornartorsiornerat, aalisartut piniartullu aatsaat taama ajornartorsiortiginerat eqqaavai, kiisalu Arctic Umiaq Line matoriaannaasoq, naalakkersuisut ikiuinianngippata.
- Siumup Kuupimmut kajumissaarutigaa nunatsini inuit ajornartorsiutaat iliuuseqarfigeqqullugit. Nunatta aningaasaqarnera ineriartorneralu tamakkiisumik Demokratinut tunniuppaa, namminerlu nunani allani nunat inoqqaavisa aallartitaattut angalanermini nunatsinni ajornartorsiutit qimarratigalugit. Nammineq Kalaallit Nunaat tikeraarlugu innuttaasut tassani najugaqartut iliuuseqarfigikkit - nunarsuarmi nunap inoqqaavi sinnerlugit aallartitatut angalajunnaarlutit. Tamanna ICC-p suliassaraa. Nunatta inuiaallu kalaallit naalakkersuisut siulittaasuat pisariaqartippaat, nammineq ajornartorsiutinut iliuuseqartoq.
- Maannakkut nunatsinni Søren Pind atorfissaqartinngilarput, naak piginnaasarpassuaqaraluartoq. Inuiaat kalaallit naalakkersuisut pisariaqartippaat, nunami namminermi ajornartorsiutinik aaqqiiniartut nunarsuup sinneraninik - qallunaat aningaasaataat atorlugit - annaassiniarunnaarluni!