Aleqa suliniaqatigiiffimmit 8. marts-gruppimit pilluaqquneqartoq
Suliniaqatigiiffiup nunarput Naalakkersuisut arnamik siullerpaamik siulittaasoqalerneranni pilluaqquaa
Nunatta arnamik siullerpaamik Naalakkersuisunut siulittaasoqalernera suliniaqatigiiffimmit 8. marts-gruppimit nuannaarutigineqarpoq.
- Naligiinnerulernissamut alloriarneq pingaaruteqarluinnartoq pivoq, nuannaarutigaarpullu Islandimi, Norgemi aammalumi Danmarkimi pisunut ilaaqqutiinnaleratta, 8. marts-gruppen Siumup siulittaasuanut Aleqa Hammondimut qinersinermi ajugaaneranut pilluaqqussuteqartoq, allappoq.
Tamatuma peqatigisaanik Nick Nielsen Ilinniartitaanermut, Piorsarsimassutsimut, Ilageeqarnermut Naligiissitaanermullu naalakkersuisutut suliniaqatigiiffimmit pilluaqquneqarpoq.
- Nick Nielsenip Naalakkersuisutut, aammalumi Naalakkersuisut tamarmiullutik naligiinnerulernissamut politikkikkut suliniutissaat, minnerunngitsumillu arnanut persuttaasarnerup unitsinniarneqarnissaanut suliniutissaat 8. marts-gruppenimit qilanaarineqarput. Taama 8. marts-gruppenimeersut Kathrine Bødker, Katrine Hjelholdt Nathanielsen, Inge S. Rasmussen, Inge Olsvig Brandt, Arnakkuluk Jo Kleist, Ivalu Risager aamma Kistaraq Egede allapput.
Inatsisartut inissitsiterfiusumik ataatsimiinneranni Aleqa Hammond sapaatip-akunnerani kingullermi tallimanngornermi Naalakkersuisut siulittaasuattut pisortatigoortumik ivertinneqarpoq.