Aleqap nunanut allanut ministeri Lidegaard nersualaarpaa

Naalakkersuisut siulittaasuata Aleqa Hammondip, Siumut, ullumi pingasunngornermi danskit nunanut allanut ministerertaava, Martin Lidegaard, Radikale Ventre-neersoq, ataatsimeeqatigaa. Martin Lidegaard ulloq 3. februar nunanut allanut ministerinngorpoq.

Naalakkersuisut siulittaasuata nunanullu allanut ministerip siumut iliuusissat qitiutillugit Danmarkip Kalaallit Nunaatalu suleqatigiinnissaat eqqartorpaat. Tusagassiivik nalunaarpoq.

Ataatsimiinnermi Issittumi suleqatigiinneq, EU-p Kalaallit Nunaatalu peqatigiillutik suleqatigiinnissamut isumaqatigiissutaat kiisalu Kalaallit Nunaanni aatsitassarsiornermut tunngatillugu aningaasaliisussanik kajumissaarinissaq pillugu suleqatigiinnissaq immikkut ittumik qitiutinneqarput.

Naleqartitanut pingaartitaqartoq
- Nunanut allanut ministeri siullermeerlunga ataatsimeeqatiginerani kingorna takusinnaalereerpara, nunanut allanut ministeri Kalaallit Nunaat naleqartitaanut soqutigisaanullu pitsaasumik paasinnittaaseqartoq. Tamatuma Naalagaaffeqatigiit sinnerlugit neriulluartilerpaanga, Danmarki nunanut allanut ministerertaarsimammat taamatut paasinnittaasilimmik, qularinngilaralu piffissami aggersumi danskit kalaallillu ataatsimoorlutik aalajangersimasunik suleqatigiissuteqarnissaannik tamanna kinguneqassasoq, Naalakkersuisut siulittaasuat Aleqa Hammond tusagassiutinut nalunaarummi oqarpoq.

- Nunanut allanut ministerilu ullumi suliassaqarfiit aalajangersimasut eqqartorpavut - soorlu nunat allat nutaamik Issittumik soqutigisaqalersimasut, kiisalu Kalaallit Nunaanni aatsitassarsiornermut tunngatillugu aningaasaliisussanik kajumilersitsiniarluni ataatsimoorluni iliuuseqarnissaq – uanga isumaga naapertorlugu ataatsimoorluta Kalaallit Nunaannut periarfissanik nutaanik pilersitseqatigiissutigisinnaasarput.

- Siunissami qaninnermi nunanut allanut ministerip Kalaallit Nunaannut tikilluaqqunissaa qilanaaraara, Aleqa Hammond oqarpoq.