nuutitseriaaneq
Aleqap Randi Broberg Siumumut nuutsikkusukkaluaraa
Partii Inuinit Randi Broberg Siumumut nuukkusussimanngitsoq KNR-imit oqaatigineqarpoq
- Taamatut Aleqa Hammondip iliuuseqarnera tupigusuutigaara nakeriallaatigalugulu. Tamannalu tusarakku, erngerlunga Naalakkersuisut siulittaasuat unneqqarissumik allaffigaara, tatigeqatigiinnermik annertuumik tamanna innarliimmat.
Partii Inuit siulittaasuat Nikku Olsen Radioaviisimut oqarpoq.
Partii Inuit Inatsisartuni ilaasortaatitatuaat Randi Broberg sapaatip akunneri marluk qaangiupput Naalakkersuisut siulittaasuannit Aleqa Hammondimit aperineqarmat Siumumut nuukkusunnginnersoq, pingasunngornermi Radioaviisimi tamanna saqqummiunneqarpoq.
Tamannali iluatsinngilaq.
Naalakkersuisut siulittaasuata Aleqa Hammondip isertuutinngilaa, Randi Broberg Siumumut nuukkusunnginnersoq aperisimallugu. Inuilli ataasiakkaat pillugit oqaaseqarusunnani.
Randi Broberg tamanna pillugu oqaaseqartinneqarsinnaasimanngilaq Arctic Winter Gamesertuni Fairbanksimi Alaskami peqataanera pissutigalugu.