Allannguuteqangaarnavianngilaq
Qinersinissamut apriilip arfernani 2021-mi pisussami naliliisartunik nutaanik Kalaallit Nunaata Radioa pilersitsivoq. Taakkulu tassaapput Siumup aamma Naalakkersuisut siulittaasorisimasaat, Lars-Emil Johansen kiisalu Inuit Ataqatigiit aamma Naalakkersuisut siulittaasorisimasaat, Kuupik Vandersee Kleist. Qinersinerup unnukkuani naliliisussat Atuagagdlliutinit naliliigallartippavut, uanilu Lars-Emil Johansenip naliliinera atuarsinnaavat.
IMMIKKUT:Nittartagaq nutaarsiassaqartitsivik Sermitsiaq.AG nutaarsiassaqartitsivimmi aviisinit marluusunit Sermitsiamit AG-millu allaaserisat iluittuutillugit qinersinissap tungaanut saqqummiussisassaaq. Atuartartut 6. aprilimi qinersinissap tungaanut ilisimasaqarnerulernissaat qinersinissamullu tunngassuteqartunik saqqummilaartitsinerunissamik aqutsisut kissaateqarnerat aallaavigalugu nutaarsiassaqartitsivik taamaaliorpoq. Allaaserisat aviisineersut nittartakkami ataatsikkut saqqummiunneqassanngillat, tulleriiaarneqassallutilli.
- Politik tassaavoq siunissamut piareersarneq pilersaarusiornerlu. Sumut siunnerfeqassaagut aamma suna qisugalugu piviusunngortissavavut. Aningaasatigut pilersaarusiornissaq pineqartarpoq, Lars-Emil Johansen erseqqissaavoq, poorskip kinguninnguatigut qinersinerup partiit ilaasortaatitaasa agguataarneqarnerisa allannguuteqangaarnissaat naatsorsuutiginngikkaluarlugu.
Lars-Emil Johansen Nuup immikkoortuani, Qinngorpumi, nerisarfimmini issiavoq, qarasaasiaq angallattagaq saavaniippoq pappialallu tigummiarpai. Tunuatungaani assiliaq Siumup pilersitsisuisa, ”pingajoqqanik” taaneqartartut, tassalu Jonathan Motzfeldtip, Moses Olsenip aamma Lars-Emil Johansenip assingat qalipagaq iikkami nivingavoq.
- Takornariaqarnerup aalisarnerullu ineriartortinneqarnissaat aamma mittarfiliortitsinissaq allarpassuillu taama takorluugaraavut. Nunap immikkoortui tamarmik assigiinngitsunik periarfissaqarput. Taakku piviusunngortinniarlugit taamani pilersaarusiorpavut, tamakkuuppullu politikerit ullumikkut aamma pilersaarusiugassaat. Taamatuttaaq aningaasaqarneq pilersaarusiugassaavoq, nassuiaavoq.
Namminersorneq Kalaallit Nunaata 2009-mi eqquppaa, tassunga atatillugu Danmarkimi naalakkersuisut isumaqatigiissusiorfigineqarmata ukiumoortumik tapiissutit qaffaqqinneqannginnissaat isumaqatigiissutigineqarput.
- Isertitsissutaasinnaasunik nutaanik maanna ujarlertariaqarpugut, aningaasaq naleerukkiartorpoq. Periarfissaasinnaasunik oqaluinnarnani iliuuseqartoqartariaqarpoq. Ukiumut 1 milliard koruuninik isertitaqarnerusalernissaq anguniarneqartariaqarpoq, Lars-Emil Johansen oqarpoq.
Kuannersuit
Kujataani Kuannersuit Inatsisartuni partiit akornanni kingullertigut assortuussutaavoq, pingaartumik Naalakkersuisut tusarniaanerat ”Kuannersuarni aatsitassanik qaqutigoortunik piiaanissamik suliniutaanut atatillugu VSB-mut aamma VVM-mut nassuiaatit tusarniaassutigineqarnerat” partiit avissaartuussutigaat. Tamannalu Siumup aamma Naalakkersuisut siulittaasorisimasaata, Lars-Emil Johansenip, ilisarnartoqartippaa.
- 2010-mili 2011-milu tamanna oqallisigilerparput. Isumaqarpunga ajornartorsiuteqanngitsoq aaqqiivigineqarsinnaanngitsunik. Periarfissanik aqqutissiuussinissaq sammineqartussaavoq, oqaluinnarluni ajornarpoq, Lars-Emil Johansen oqarpoq.
Inuit Ataqatigiit qinersinerup kingorna aalajangiisussanngussagaluarunik tusarniaaneq unitsissallugu ilaatigut qineqqusaarutigaat. Siumut isumaqarpoq Kuannersuarni aatsitassarsiornissaq inunnut avatangiisinullu ajoqutaanngippat pitsaaqutissartaqartoq. Tusarniaaneq unitsinneqassappat inatsisisinik unioqqutitsisoqassasoq Siumut aamma isumaqarpoq.
- Aningaasanilli amerlarusunik pisariaqartitsinitsinni Kuannersuit avaqqussinnaanngilarput. Tamannali qinersisartut aalajangigassaraat, ilimagaaralu qineqqusaarnermi sammineqartut pingaarnerit ilagissagaat, Lars-Emil Johansen oqarpoq.
Partii talerperliunerusoq, Demokraatit, aamma saamerliunerusoq, Inuit Ataqatigiit, ukiuni 2009-2013-imi naalakkersuisoqatigiipput, taakkulu pingaartitaasa ilagaat suleqatigiissutigisinnaasanik sammisaqarnissaq. Kuannersuit assortuussutiginissaat taamaalillutik pinngitsoortissimavaat.
- Apeqqutaavoq massakkut taamaaliornissatsinnut akissaqassanersugut. Aningaasanik isaatitsissutissanik allanik periarfissaqarpat soorunami taanna malissavarput. Kuannersuilli kisimik periarfissaappata unitsinneqassappallu tunniutiinnarnerussaaq, Lars-Emil Johansen erseqqissaavoq.
Siumut
Siumup nutaamik novemberimi sulittaasortaarsimanera Lars-Emil Johansenip soorunami arajutsisimanngilaa. Naalakkersuisut aamma Siumup taamani siulittaasuata, Kim Kielsenip, partiimi siulittaasuuffik Erik Jensenimut tassani tunniuppaa. Lars-Emil Johansen tassunga assingusumik aamma inissisimanikuuvoq, tassalu partiimi 1987-imi siulittaasunngorami, Naalakkersuisut siulittaasuat Jonathan Motzfeldt kingoraarlugu. Partii Lars-Emil Johansenip aqussagaa kiisalu Jonathan Motzfeldip Naalakkersuisut aqussagai akunnerminni namminneq taamani isumaqatigiissutigaat. Taamani ajunngivissumik aaqqiisimallutik Lars-Emil Johansen isumaqarpoq, naak politikkimik malinnaasut allatut isumaqarsinnaagaluartut:
- Piffissap annersaa ajunngitsumik ingerlavugut, Inatsisartunulli qinersinissaq qanilliartortilugu partiip siulittaasuata Naalakkersuisut siulittaasuattut inissittarnissaa ajornannginnerussasoq isumaqatigiissutigaarput. Kim Kielsenimut aamma Erik Jensenimut tunngatillugu partiip siulittaasua Naalakkersuisut siulittaasuattut inissittariaqartoq isumaqarpunga, oqaluttuarisaaneq aamma eqqarsaatigalugu.
Demokraatit Naalakkersuisoqatigiinnit aninerannut partiinillu illuatungiliuttunut isumaqatigiissuteqarlutik ikerinnakkut qinersinissamut piumasaqarnerannut tunngavilersuutaasa ilagaat Kim Kielsenip aamma Erik Jensenip tamanut ersittumik isumaqatigiinngissuteqarnerat. Kina nunamik aqutsisuunersoq imaluunnit kina Siumumi siulittaasuunersoq paatsiveerunnerarlugu Inatsisartuni partiip illuatungiliuttutut inissisimasup Inuit Ataqatigiit qinersinissamik piumasaqarnerminnut aamma tunngavilersuutigaat. Kim Kielsenimulli aamma Erik Jensenimut tunngasoq qinersinermut toqqaannartumik sunniuteqassanersoq Lars-Emil Johansenip nalileruminaatsippaa. Partiilli iluani isumaqatigiittoqartuaannassappat aamma pitsaasuunngitsoq erseqqissaatigaa, tamanna partiimut sanngiillisaataaginnassammat:
- Kisianni kina partiimi siulittaasuussanersoq partiip nammineq aalajangigassaraa, tamannalu partiit allat akuliuffigisassarinngilaat.
Allannguuteqangaarnavianngilaq
Lars-Emil Johansenip Inatsisartuni partiit annerit agguataarnerisa allannguuteqangaarnissaat ilimaginngilaa.
- Partiilli mikinerusut sukataartariaqassapput. Suleqatigiissitsisut uani eqqarsaatigaakka, taakku siulittaasuata aningaasanik atuisimanini pillugu partiimi iluani aaqqiagiinngissuteqarsimavoq. Demokraatit piffissami kingullermi aamma nutaamik siulittaasortaarsimapput, Inatsisartunut qinigaalluartortaata Niels Thomsenip politikkimik qimatsinerata kingornatigut. Siulittaasuat Inatsisartuni ilaasortaanngilaq. Tamanna partiimut sanngiillisaataasinnaavoq. Kisianni Siumup aamma IA-p pakassumminnissaat ilimagaara, naggasiivoq.
Allaaserisaq aviisimit AG-mit uge 12-imi saqqummersumit aaneqarpoq: