Aluminiumik suliniut annertusarneqarpoq

Qeqqata Kommuneata Peter S. Olen aamma Tønnes Berthelsen atorfinitsippai qanimut suleqatigiillutik aluminiumik suliniummik sulinermik annertusaasussatut.

Peter S. Olsen aluminiumik ataqatigiissaarisutut atorfinitsinneqarpoq suliarissallugulu suliniuterpassuit, aluminiumik suliniummut atasut, ataqatigiissarnissaat. Pingaartumik tassaapput innuttaasunik sullissineq, taamaasilluni Maniitsumi innuttaasut suli periarfissaqarniassammata aluminiumik suliniummut illoqarfiullu ineriartorneranut sunniuteqaqataanissaminnut. Taamaasilluni Maniitsormiut siunissami Peter S. Olsen saaffigisarsinnaavaat aluminiumik suliniummut paasissutissarsiorlutik.

- Peter S. Olsenip aluminiumik suliniut ataqatigiissassavaaa inuussutissarsiortunut avataanilu suleqatigisanut soorlu Alcoamut, Greenland Developmentimut aamma Namminersorlutik Oqartussanut atatillugu. Tamatuma saniatigut nunarsuarmi aluminiumik suliniutinit allanit paasisanik misilittakkanillu pissarsiniarluni suliaq pingaarutilik siunissami suli pingaartinneqarnerussaaq. Taanna inunngorfimminut Maniitsumut utissaaq ukiorpassuarni Nuummi KANUKOKA-mi Namminersorlutillu Oqartussani sulereerluni, Qeqqata Kommunia tusagassiorfinnut nalunaarummi allappoq.

Tønnes Berthelsen suliniummi siunnersortitut atorfinitsinneqarpoq kommunimilu suliniutit anginerusut isumagissallugit. Aallaqqaammut pineqarpoq illoqarifup ineriartornerata pilersaarusiornissaa, aluminiumik suliniutip kingunerisaanik, tamatumani ilanngullugit kommunimut pilersaarummi allannguutit ilanngunneqarnissaat. Tønnes Berthelsenip tamatumunnga atatillugu Maniitsumi inuussutissarsiornermi pisortatut atortorissaatinullu innuttaasut gruppianni ataqatigiissaarisutut misilittakkani iluaqutigisinnaavai.

- Tønnes Berthelsen illoqarfiup ineriartortinneranut atatillugu innuttaasut gruppiata takorluukkatut nalunaarusiaa, norskillu illussanik titartaanermik ingerlatsiviata 70gr N-p takorlluukkatut nalunaarusiaa ingerlateqqissavaa. Kommunip ukiup kingulliup ataatsip ingerlanerani takorluukkatut nalunaarusiat taakkua marluk suliarisimavi, ilaatigullu innuttaasut gruppiata arfernik nasiffimmik siunnersuutaat piviusunngortissimallugu. 70grN-p takorluukkatut nalunaarusiaanut atatillugu kommunip issittumi ingeniøritut praktikkertuata Anders Vahlgrenip qaammatini kingullerni illoqarfeqarfissat nutaat tikinneqarsinnaasut iluatsittumik misissorsimavai. Piareersarneq tamanna ataatsimut pilersaarutinngortissavaa, Qeqqata Kommunia nalunaarpoq.