Amerikamiut konsuliat Kommuni Qeqertalimmut tikeraartoq
Kommuni Qeqertalik Amerikamiut Nuummi konsuliannit sapaatip-akunnerani kingullermi tikeraartoqarsimavoq. Tikeraarnerup Kommuni Qeqertaliup USA-llu sukkut suleqatigiissinnaanerat ineriartortinneqarsinnaasunullu qanoq aningaasaliisoqarsinnaanera pillugit qanimut oqaloqatigiinnerulersippai.
Sapaatip akunnerani kingullermi Qeqertalik Business Council Amerikap Nuummi aallartitaqarfianiit Kommune Qeqertalimmi tikeraartoqarnerani aaqqissuusseqataavoq. Tikeraartoqarnermi USA-p Qeqertaliullu immikkoortortaqarfimmi sutigut ineriartortitseqqinnissamut periarfissanik suleqatigiinnerulernissamik aningaasaleeqataaffiusinnaasunillu ujartuissallutik illugiimmik qanimut oqaloqatigiissuteqarput, Kommuni Qeqertalik Business Council tusagassiorfitsigut nalunaaruteqarluni allappoq.
- Kommuni Qeqertalimmut tikeraarnera pissarsiaqarfigilluaqaara. Tamannalu Amerikap tungaaniit, USA-p Kalaallit Nunaatalu nukittunerusumik attaveqatigiinnerulersitseqataaffigisinnaanera nuannaarutigaarput. Qeqertalimmilu tikeraarnitta periarfissanik amerlanerusunik qanorlu annertunerusumik suleqatigiiffiusinnaanerannik pilersitsivoq, Elizabeth Feary tikeraarnini pillugu oqarpoq.
Misissueqqaarnerit
Konsulip tikeraarnini aallarnerlugu kommunimit sinniisut najukkamilu inuussutissarsiuteqartut peqatigalugit aatsitassarsiutileqatigiiffiit marluk Qeqertarsuarmi misissueqqaarnissaat pillugu internetsikkut ataatsimeeqatigalugillu oqaluttuartippai.
Angalanermi Qeqertarsuup illoqarfia aamma tikeraarneqarpoq, matumanilu illoqarfimmi inuussutissarsiutillit ataatsimeeqatigineqarlutik. Kiisalu Angakkussarfik Arktisk Station, aamma Kuannit Art suliaannit pilersaarutaannillu paasisaqarfigineruniarlugit pulaarneqarlutik.
Aasianni ilinniartitaanermi suliniut
Amerikap aallartitaqarfiata tikeraarneranut aamma siunertaasut ilaat, Gammeqarfimmi atuarfiup aallarteqqinnerani misiliummik suliniutaalluni pilersinneqalersoq alakkaaffigaa.
Tassami USAID-ip Fonden for Entreprenørskabip suliniutaasa ilaat aningaasaleeqataaffigisimavaat, tamannalu nutaaliorsinnaassutsip meeqqat atuarfianni ilinniartitaanerannut eqqunneqarnissaanut tunngassuteqarpoq. Uuma suliniutip atuartut nutaaliorsinnaanerannut isumassarsiorsinnaanerannullu nukittorsaataasussaavoq. Taamaattumillu Elizabeth Fearyp atuarfik pulaarumasimavaa, ilaatigullu atuarfimmi periarfissat atuarfiullu oqaluttuassartaa paasisaqarfigisimallugit.
FFE-p suliniutaa nunami atuartitsissutinut atuutereersunut ajornartorsiutitaqanngitsumik atuutsinneqalersimavoq, inuusuttullu nunarsuarmik unammillerfioqisumi piginnaasaqalersinneqarnissaat, tunngavissaqalersinneqarnissaat piumassuseqalersinneqarnissaallu tassani anguniagaalluni.
USA-mut attaveqarneq nukittunerulersinneqartoq
Elizabeth Fearyp Aasiannut tikeraarnermini Qeqertannguaq kiisalu Tupilaap qeqertaa tummarpai, tassanilu ilaatigut sorsunnersuup aappaata nalaani amerikamiut Aasianni baseqarfigisimasaat alakkaaffigisimallugit.
- Tikeraartoqarnerput Amerikap aallartitaqarfianut qaninnerulersitsivoq, taamatuttaarlu ataatsimut isingalugu USA-mut qaninnerulersitsilluni. Tamannalu nuannaarutigeqaarput, tassami periarfissanik aningaasaliisinnaassutsinillu nutaanik, minnerunngitsumillu nunatsinnut illuttut akimut suleqatigiiffiusinnaasunik immikkoortortaqarfitsinni inuussutissarsiutilinnut iluaqutaasinnaasunik pilersitseqataaffiummat, Qeqertalik Business Councilimi pisortaaneq Gerth P. Olsen oqarpoq.