Amerikamiut qimataannik saliineq ingerlaannassasoq
Danmarkimi aningaasanut inatsimmi 2024-mi 73,2 millionitkoruunit aningaasaliissutaapput.
Januaarimi 2018-imi Naalakkersuisut siulittaasuat Kim Kielsen aamma Danmarkimi avatangiisinut inuussutissanullu ministeri Esben Lunde Larsen isumaqatigiissummik atsioqatigiipput, Kalaallit Nunaanni Amerikamiut Kalaallit Nunaanniissimanerisa kingunerisa salinnissaat pillugu.
Taamak allaaserinnippoq aviisi Sermitsiaq.
Danmark 180 million koruuninik ukiuni arfinilinni illersornissaq pillugu isumaqatigiissummi 2018-23-mi suliassamut aningaasaliivoq, sapaatilli akunnerata tulliani isumaqatigiissut naappat 180 million koruuninit taamaallaat 40 millionit atorneqarsimassapput.
Danskilli kalaallillu isumaqatigiissutaani ersarissumik allassimavoq ukiut arfinillit pisariaqassappat sivitsorneqarnissaat qinnutigineqarsinnaasoq. Tamannalu decembarip 14-ani pivoq, Folketingimi 2024-mut Danmarkimi aningaasanut inatsisissaq akuersissutigineqarmat. Aningaasat sinneruttut 140 million koruunit ukiunut sisamanut tulliuttunut aningaasaliissutaapput, 2024-iinnaq 73,1 million koruunit aningaasaliissutaallutik.
Allaaserisaq tamaat aviisimi Sermitsiami atuaruk.
