Amigartoorutit "taamaallaat" 950 millioner koruunit
jKukkunersiuinermut ataatsimiititaliap landskarsip 2009-mut naatsorsuutai misissoqqissaassavai.
Landskarsip 2009-mi amigartoorutai ersissutigineqartutut milliardiunngillat, taamaallaallit 950 millioner koruuniullutik. Naammarujussuaqaalli:
– Landskarsi aatsaat taama amigartooruteqartigaaq, amigartoorutillu isertitat 16 procenteraat, aningaasaqarnermut naalakkersuisoq Palle Christiansen, Demokraatit, oqarpoq.
Landskarsip naatsorsuutai maanna Kukkunersiuinermut Ataatsimiititaliamit misissoqqissaarneqassapput, taannalu Inatsisartut ukiakkut ataatsimiinneranni isumaliutissiissumminik saqqummiussissaaq: – Taava allaaserisassaqaqqilissaaq, Palle Christiansen tusagassiortunut oqarpoq.
Inatsisartut 2008-mi ukiakkut 2009-mut aningaasanut inatsit 441 millioner koruuninik amigartooruteqartussaq akuersissutigaat, juunilli 2-anni qinersinermut kingorna naalakkersuisut nutaat suliassamik siullersaattut Royal Greenland 500 millioner koruuninik ikiorsertariaqarsimavaat, ukiullu naalernerani Qaasuitsup Kommunia 53 millioner koruuninik taarsigassarsitillugu, akileraarutinut akiligassatoqqanut akiliutissatut.
Taamaasilluni landskarsi imaajarneqarpoq: 2009-p aallartinnerani 2 milliarder koruunit karsimiittuutigineqarput, ukiulli naanerani 1,3 milliarder koruunit sinnerussimapput. PIffissami matumani Palle Christianseip Nordisk Investeringsbank isumaqatigiinniarfigaa landskarsimut pingasunik kisitsisitalinnik taarsigassarsinissamut, aningaasallu taakkua nukissamik pilersuiffimmut Nukissiorfinnut ingerlateqqinneqassapput erngup nukinganik nukissiorfiliornerit ingerlateqqinnissaanut.
2009-mi aningaasanut inatsimmi missingersuutigineqarsimavoq akileraarutitigut 848 millioner koruuninik isertitsisoqassasoq, ilaatigulli namminersortut ikileriarnerat pissutigalugu isertitassat 20 millioner koruuninik ikinnerupput. Akileraarutinut akiliisitsiniartarnermullu tunngasut qitiusumik aqunneqalernerat kommuninit sakkortuumik isornartorsiorneqarpoq, landskarsillu kukkunersiuisuata Deloitte-p 2009-mi akileraarutitigut isertitat nangaanartoqartippai.
– Soorunami kukkunersiuisup oqaaseqaatai taamaattut tusaanngitsuusaaginnarsinnaanngilagut, Palle Christiansen oqarpoq, taannalu suleqatigiissitaliorpoq akileraarutitigut isertitat qularnartoqartinneqarnerat qaangerniarlugu.