Anaanaq kisermaaq qinersinissamik piumasaqarluni atsiornernik katersivoq
Piffissanngorpoq Inatsisartunut qinersinissamut. Taamak innuttaasoq isumaqarpoq, taanna atsiornernik katersinermini tunngavilersuivoq, inuuniarnermi atukkat maannakkut naalakkersuisuusut nalaanni ajornerulersimasut.
Innuttaasut qinersinissamut ukioq ilivitsoq utaqqeqqissinnaanngillat maanaannarlu qinersisoqartariaqarpoq.
Taamak isumaqarpoq innuttaasoq, siusinnerusukkut Sermitsiaq.AG-mut qitornanilu qanoq atugaqarnertik pillugu oqaluttuarnikuusoq.
Najarak Svendsen atsiornernik katersinermik pilersitsisutut nalunaarsoqqavoq skrivunder.net-imi.
- Inunnut atugassarititat ajorsigaluttuinnarput. Nerisassat akitsoraluttuinnarput ikiorsiissutillu ikiligaluttuinnarlutik. Angajoqqaat meerartallit nerisassaqarumallutik inoqatiminnut ikioqqusariaqartarput.
Taamak aallarniuteqarpoq atsiornernik katersinermi tunngavilersuutit aallartinneranni, atsiortitsineq 1. februar aallartinneqarpoq.
Atsiortitsinernillu katersinermik aallarniisuuvoq Najarak Svendsen, tamanna quppernermi takuneqarsinnaavoq.
Taanna siusinnerusukkut Sermitsiaq.AG-mut oqaluttuarnikuuvoq inatsisit allanngortinneqarnerisigut pisortanit ikiorsiissutit pillugit malittarisassat nutaat ukiortaamiit atuutilersinneqarnerini aningaasatigut ajornartoortarnini annertunerulersimasoq. Akiligassat tamaasa akilereerlugit aningaasamininnguit qitornanilu inuussutiginiagassatik ikittuararsuusut Najaaraq Svendsen erseqqissaanikuuvoq.
Aningaasaateqarnerulersitsinissamik neriorsuut qineqqusaarutaannaavoq
Atsiornernik katersinermi maannamut inuit 60-it sinnilaarlugit atsioqataasimalereerput.
Qinersinissamik piumasaqarluni atsiortitsinermi tunngavilersuutigineqartut ilagaat, utoqqaat utoqqalinersiallit neriniartarfinni cafenilu nerisat sinnerinik qinuloortalersimasut aammalu aalisartut inuussutissarsiutiminnik annaasaqarsinnaasut aalisarnermik inatsisissaq pissutaalluni.
Taamatuttaaq Najarak Svendsen atsiornernik katersinerminut tunngavilersuuteqarpoq, Naalakkersusisut qinersisartunut neriorsuutiminnik naammassinnissinnaasimanngitsut:
- Qineqqusaarnermi Naalakkersuisut siulittaasuat qineqqusaarpoq inuit kaasarfimmiui amerlineqassasut. Massakkullu killormorluinnaq ingerlasoqarpoq Kalaallit perlersiarineqalerput, inigisamulluunniit akiliisinnaajunnaartussanngorlutik, tunngavilersuutinut ilaavoq.