Anbragte trives bedst hos slægtninge
Meeqqat aanakkuminnut ilaquttanulluunniit allanut inissinneqartartut angajoqqaarsiartaarnikuniit inuunerinnerusarput
Meeraq angerlarsimaffiup avataanut inissinneqartussanngoraangat meeqqap ilaquttamini inissinneqarnissaa kommunep salliutippagu isumatusaarnerussaaq.
Meeqqat aanakkuminni ilaquttaminnulluunniit inissinneqarsimagaangata angajoqqaarsianut inissinneqarsimasunut naleqqiullugit akuerisaasutut misigajunnerusarput, saniatigullu anaanaminnut ataataminnulluunniit attaveqarniartarnertik ajornannginnerutittarlugu.
- Siornatigut meeqqat avatagiisitoqqaminniit avissaartinniassallugit salliutinneqartarsimavoq, allaammi Jyllandimi angajoqqaarsiartaartinneqaraangata pitsaanerpaajusutut isigisarsimallutigu. Ukiunili qaninnerusuni paasisavut naapertorlugit meeqqat ilai ilaquttaminnut inissinneqarsimagaangata pitsaanerujussuusarsimavoq, taama Klaus Wilman, Københavnip Kommuneata ilaqutariinnik isumassuisarfianni ittuusoq oqaluttuarpoq.
Taamaammat kommunip paasisimasaa danskit inuunerinnissamik misissuisarfiata SFI-p nuna tamakkerlugu misissuinerata inerneranut naapertuunnera taasariaqarpoq, tassami meeqqat ilaquttaminnut inissinneqarsimasut angajoqqaatik attaveqarfiginerusaraat tarnimikkullu ajornartussiuteqannginnerat paasineqarsimammat.
Taamaattorli meeqqat ilaqutaanut inissiinissamut periarfissaq kommunit tunuarsimaarfigaat.
Ullumikkut meeqqat angerlarsimaffiup avataanut inissinneqartartut 8 procentiisa ilaquttaminnut inissinneqartarmata Københavnip kommuniata siuttutut inissisimaffigivaa, nunali tamakkerlugu meeqqat 5 procentiinnai ilaquttaminnut inissinneqartarput, Langelandimilu meeqqat angerlarsimaffiup avataanut inissinneqartartuni taamaallaat 1,6 procentii ilaquttaminnut inissinneqartarput.
Taamaattoqarnerali peqqutissaqavippoq, taama Helle Hansen (SF) kommunep inunnik isumaginninnermut ataatsimiitaliaani siulittaasoq oqarpoq.
- Amerlasoorpassuartigut ilaquttanut inissiisoqarsinnaaneq ajorpoq, tassami ilaqutariit sanngiitsuukkajuttarput nukissaqartarnatillu. Aamma ilaannikkut soorlu ilaqutarisat meerarpassuaqarpallaartarput imaluunniit meeqqap atuarfianniit ungasippallaami ilaquttat najugaqartarlutik, taama Helle Hansen naggasiivoq.