Ane Hansen: 2022 meeqqat ukiorivaat
Kommune Qeqertalik suliniutinik arlalinnik, meeqqanut tunngassuteqartunik, aallartitsillunilu naammassisaqarpoq. Kangaatsiami nutaamik atuarfeqalerpoq Niaqornaarsummilu nutaamik meeqqeriveqalerluni.
Ukioq 2022 naangajalerpoq. Kommunini borgmesterit ukiup qanoq ingerlasimanera pillugu Sermitsiaq.AG-p aperai. Allaaserisami uani Kommune Qeqertalimmi borgmester Ane Hansenip (IA) akissutai atuarsinnaavatit.
Kommune Qeqertalimmi kommunalbestyrelsep meeqqat atugassarisaat 2022-mi aallutingaatsiarsimavaat. Kangaatsiami atuarfittaaq ammarneqarpoq, soorlu aamma Niaqornaarsummi meeqqerivittaartut.
Taakku saniatigut meeqqat kinguaassiutitigut atornerlunneqannginnissaannut pinaveersaartitsinernik suliat aallartinneqarput. Misissuinerimmi takutissimavaat innuttaasut amerlangaatsiartut kinguaassiutitigut atornerlungaasimasartut.
- Misissuinerup ersersippaa suli kinguaassiutitigut atornerlunneqarsimasut inersimasut amerlavallaartut, meeqqanillu suli kinguaassiutitigut atornerluisoqartarluni. Tamanna anigorniarlugu suliniutit ataavartut ingerlanneqalerput, pinaversartitsinermillu suliniutit ersarinnerulerlutik. Meeqqanut inuusuttuaqqanullu siunnersuisarfipput MISI angajoqqaat ilangullugit katsorsaanerit ingerlatilerpaat, borgmester Ane Hansen (IA) nassuiaavoq.
Meeqqat sinniisaat aallartittut
Kommune Qeqertalimmi meeqqat sinniisaannik, kommunalbestyrelsep sulinerani sunniuteqaqataasinnaasunik pilersitsisoqarpoq. Tamannalu kommunit allat isumassarsiorfigisinnaassagaat, borgmester isumaqarpoq.
Meeqqat inuusuttullu pillugit kommunimi suliniutit arlallit saniatigut, borgmesterip innuttaasut oqariartuuteqarfigiumavai meeqqanut maligassiuisussaaneq pillugu.
- Ileqqulersuutigut pitsaanngitsut meeqqatsinnik ilungersuutigineqaqisut allanngornissaannut tamatta suleqatigiinnissarput pisariaqarluinnarpoq, meeqqammi ajornartorsiulersittarnerat inuiaqatigiinnut akisuinnarani meeqqat siunissaannut annertuumik innarliisarmat, borgmesteri oqarpoq.
Ukiut qulini pilersaarut
Meeqqanut inuusuttunullu suliniutit saniatigut Qeqertalimmi inuussutissarsiorneq takornarialerinerlu aamma inerisarneqarput. Borgmesterilu isumaqarpoq tamanna malunnaateqalereersimasoq, inerisaanerillu ukiut tulliini ingerlaannassasut.
Kommune Qeqertalimmi borgmesteri, Ane Hansen, ilaquttani juullisioqatigissavai.
Ukiortaareerpallu kommunalbestyrelsep kommunip ineriartortinnissaanut ukiunut tullernut qulinut pilersaarut suliarissavaat, eqqaaveqarneq aallutissallugu kiisalu meeqqanut inuusuttunullu periarfissanik pitsanngorsaassallutik.