Ane Hansen: Qernertanik qilalugartassiinermi assigiinngisitsisoqarpoq

Inuit Ataqatigiit sinnerlugit Inatsisartuni ilaasortaq Ane Hansen piumasaqarpoq Qeqertarsuup tunuani qernertanik qilalugartassat ilaneqassasut Upernavimmi pisassat ilaneqaneqassappata. Taanna isumaqarpoq assigiinngisitsisoqalerumaartoq Upernavimmi taamaallaat pisassat ilaneqassappata.

Upernaviup eqqaani qernertanik qilalugartassat 30-nik ilaneqarnissaat Naalakkersuisut sulissutigaat. Suliaq aallartippoq aalisarneq taavani unittoormat aammalu puisit amiinik tunisineq unimmat. Taamaattoq Ane Hansen isumaqarpoq aalisartut piniartullu Kullorsuarmiut ukioq naallugu aningaasarsiornissamut periarfissaqarluarsimasut.

Pisasseeqqinnissaq neriorsuutigereerpaat
- Kullorsuarmi ukioq tamaat qaleralinniareerlutik puisit amiinik tunisisinnaarerlutik qerititsiviup ulikkaartornera pissutigalugu ulloq siullermiit qilalugartassaasa ilanissaat Naalakkersuisumik neriorsuutigineqarpoq inuuniarnerminni ajornartorsiortutut taaneqarlutik, Ane Hansen allappoq paragraf 37-lu naapertorlugu Naakakkersuisunut apeqqutigalugu Qeqertarsuup tunuani qernertanik qilalugartassat ilaneqalersaarnersut.

Qeqertarsuup tunuani qernertanik qilalugarniarneq januarip unitsinneqarpoq pisassat tamakkerneqarmata. Ane Hansen isumaqarpoq Qeqertarsuup tunuani aalisartut piniartullu Upernavimmiunut sanilliullutik immikkoortinneqartut.

Suli ilungersornerupput
- Sooq Qeqertarsuup tunuani piniartut ajornerujussuarmik inissisimasut, nipisallu suanniarnerup aallartinnissaata tungaanut ilaasa qaammatit tallimat tikillugit inuuniarnermikkut ajornartorsiuteqarsimasut assinganik pineqassangillat, Ane Hansen oqarpoq.

Upernaviup eqqaani qernertanik qilalugartassat 30-nik ilaneqarnissaat Pinngortitaleriffimmi biologit nangartarpaat isumaraqamik taama pisoqassappat nungusaataanngitsumik atuineq innarlerneqassasoq.

Taamaammat Ane Hansenip tusarusuppaa suna tunngavigalugu biologit nangartaanerat Naalakkersuisut tusaaniannginneraat.