Ane Lone Bagger: Naqinnernik ilisarinnissinnaanngitsunut misiliut suliarineqarpoq
Meeqqanut 1.-3. klasseni atuartuusunut atuarnermik allanniarnermillu ajornartorsiuteqarlutik naqinnernik ilisarinnissinnaannginnermut pasitsaassaqarnermi misiliutaasartussaq suliarineqarpoq. Naalakkersuisoq Ane Lone Bagger taama ilisimatitsivoq.
Inunnut allassinnaanermut atuarsinnaanermullu ajornartorsiuteqartunut ikiuutissaqareerpoq.
Ane Lone Bagger Sermitsiaq.AG-mut taama nassuiaavoq.
Kalaallilli oqaatsitsinnut sumiorpaluutitsinnullu tulluarsakkamik naqinnernik ilisarinnissinnaanngitsunut misiliummik peqanngitsugut, aamma oqaluttuarpoq.
- Naqinnernik ilisarinnissinnaanngitsuunermut misiliutissamik suliaqarneq suli ingerlavoq. Oqaatsigut allanit assigineqanngillat. Assersuutigalugu qallunaat misiliutaat kalaallisuumut nuuginnarsinnaanngilarput, oqaatsit sannaat assigiinngimmata, ilinniartitaanermut naalakkersuisoq Ane Lone Bagger nassuiaavoq.
Taassuma ilanngullugu oqaluttuaraa Kalaallit Nunaannit Finlandimut paasisassarsioriartortoqarsimasoq, oqaatsit sannaat assigiissuteqarnerat pissutigalugu.
Atuarluni misiliutissap suliarineqarnera ukiuni arlalinni ingerlasimavoq:
- 2011: Naalakkersuisut Inatsisartunit peqquneqarput naqinnernik ilisarinnissinnaanngitsut pillugit nuna tamakkerlugu pilersaarusioqqullugit
- 2012: Naalakkersuisut nuna tamakkerlugu pilersaarusiornissamut misissuillutik aallartipput
- 2014: Ilisimasat, atortut, aningaasalersuinissarlu pissutigalugit nuna tamakkerlugu pilersaarusiornissaagaluaq unitsinneqarpoq
- 2015: Atuarnermut misiliut atuartitsissutissallu suliarineqarnissaat pilersaarusiorneqalerput
- 2020: Misiliutip naammassinissaa naatsorsuutigineqarpoq
- Atuarsinnaanermut misiliut meeqqanut tulluarsarneqarsimavoq. Taamaammat inersimasunut naqinnernik ilisarinnissinnaanngitsunut suli misiliuteqanngilaq. Misiliut atorlugu nappaatip soorpiarnera qulakkeerlugu paasisinnaanavianngilarput, qanorli ikiorsiinissamut tunngavissaqalissalluta, Ane Lone Bagger oqaluttuarpoq.
Ilinniartitaanermut aqutsisoqarfik naqinnernik ilisarinnissinnaanngitsuuneq pillugu novemberimi isumasioqatigiissitsissaaq.
Ikiortissaqarpoq
Sermitsiaq.AG-p siornatigut oqaluttuaraa naqinnernik ilisarinnissinnaanngitsoq ikiortissaasuagami nammineerluni ikiuutissanut aningaasartuuteqartariaqarsimasoq. Naqinnernik ilisarinnissinnaannginnermut misilinneqarsimanngilaq, ikiorneqarsinnaasimananilu.
Ilinniartitaanermut naalakkersuisoq nassuiaavoq ikiuutinik akeqanngitsunik aamma peqartoq:
- Martha akeqanngitsumik aaneqarsinnaavoq. Martha tassaavoq atortorissaarut, atuffassisinnaasoq, naqinnernillu ilisarinnissinnaanngitsunut iluaqutaasussaq, oqarpoq.
- GUX-S Qaqortumi inunnut innarluuteqartunut allatigulluunniit nappaateqartunut, ilinniarnertuunngorniarfimmili ilinniagaqarusuttunut periarfissaqartitsivoq. Aamma qularutiginngilara NI aamma inuussutissarsiornermut ilinniarfiit allat naqinnernik ilisarinnissinnaanngitsunut siunnersuilluartartut, oqarpoq.
Suli suliassaqarpoq
Taassuma erseqqissarpaa atuarsinnaanermut misiliummik suliaqarneq ukiamut uninnavianngitsoq.
- Suli suliassaqangaatsiarpoq. Atuarsinnaanermut misiliut maanna misiligarneqarpoq, inernerilu novemberimi isumasioqatigiinnermi saqqummiunneqassapput. Misiliulli suli ineriartortinneqassaaq, Ane Lone Bagger oqarpoq.
Taanna oqaluttuarpoq Kalaallit Nunaanni naqinnernik ilisarinnissinnaanngitsut Danmarkimiit procentitigut ikinnerusut. Danmarkimi innuttaasut 5-7 ptocentiisa akornanni naqinnernik ilisarinnissinnaanngitsuupput, imaluunniit allannissamik atuarnissamillu ajornartorsiuteqartuullutik.