Angajoqqaanik pikkorissartitsinerit naak-uku?
Angajoqqaanik pikkorissartitsinerit ukiortaamiit aallartittussatut inatsisartut ukiut marluk sinnerlugit matuma siorna aalajangigaat sooq aallartinneqarsimannginnersut Demokraatit paaserusuppaat.
- Angajoqqaat pikkorissartinneqartalernissaannut tunngatillugu Naalakkersuisunut apeqquteqaatinnut akissuteqaat 23. januar 2009 tigugakku tupaallassimavunga. Naatsumik oqaatigalugu Ilaqutareeqarnermut Peqqinnissamullu Naalakkersuisup akissutaasigut paasinarpoq angajoqqaat pikkorissartinneqartalernisaat suli aallartinneqarsimanngitsoq.
Taama Demokraatit siulittaasuat Jens B. Frederiksen apeqqummini allami tunngavilersuilluni allappoq.
- Tamanna naammaginanngitsutut nalilertariaqarpoq. Inatsisartummi aalajangiunnikuuvaat angajoqqaat pikkorissartinneqartarlernissaat 1. januar 2009 aallartissasoq. Taamatut aalajangerneq pivoq 2006-imi Inatsisartut ukiaanerani ataatsimiinneranni.
Inatsisartut aalajangernerat imatut oqaasertalerneqarsimavoq:
»Inatsisartut aalajangiuppaat Naalakkersuisut - Kalaallit-nunaannni kommunit suleqatigalugit – 1. januar 2009 aallarnerfigalugu angajoqqaanngortussat angajoqqaat pikkorissartinneqartalernissaannut neqeroorfigisalerssaannik piareersaanissamik suliakkerneqassasut, tamakkualu tunngavigalugit angajoqqaat nakkaattoornissamut qanittumik inissisimasut pikkorissarnissanut taakkununnga peqataasalernissaannik kaammattorneqassasut, taamaaliornikkut qitornartaassamik inuunermik aallartitsinissaannut tunniussaqarnissamut piareersimanerulerniassammata. «
- Inatsisartut siunnersuummik matuminnga aalajangiussaqartut, tassa Naalakkersuisut sulisitsisui, paatsuugassaanngitsumik aalajangiussaqarput, tassa siunissami angajoqqaanngortussat qitornaminnik perorsaasinnaanissaannut piginnaaneqalernissaat siunertaralugu, ilarpassui siunnersuutip piviusunngortinneqarneratigut qaangivigineqarnissaannut annertuumik iluaqutaasinnaagaluarpoq maannalu UNICEF-ip nunatsinnut tunngatillugit maalaaruteqarneratigut saqqummiunneqarput, Jens B. Frederiksen allappoq.
Massakkut paaserusuppaa sunaana pissutigalugu angajoqaanngortussat pikkorissarneqarnissaannik suli neqeroorfigineqannginnersut, kiisalu inatsisartut ukiut marluk sinnerlugit matuma siornatigulli aalajangigaannik Naalakkersuisut piffissarititaasup iluani piviusunngortitsisimannginnerannut kina akisussaanersoq.