Angajoqqaarsiat sammineqartut: Siunnersorneqarsinnaalerlutillu saaffiginnissinnaalerput
Kommune Kujallermi angajoqqarsiaasut ilisimasanik nutaanik immersorneqarput, maannalu angajoqqaarsiaasut sapaatip-akunneranut marloriarlutik saaffiginnittarsinnaapput siunnersorneqarlutillu.
Angajoqqaarsiatut meeqqamik paarsilluni ilaatigut perorsaaqataaneq nalorninarsinnaasarpoq. Tamannalu pillugu Kommune Kujallermi angajoqqaarsianut siunnersortit angajoqqaarsiaasunut ilisimasassanik nutaanik qaammammut ataasiarlutik saqqummiussisalissapput, Kommune Kujalleq nittartakkamini allappoq.
Ilisimasaqalerneq ilaatigut aliasunnermut annaasaqarnermullu tunngassuteqarpoq. Kommune Kujalleq maanna qaammatit tamaasa angajoqqaarsianut ilisimasanik saqqummiussisassaaq, tamannalu taakkunannga tigulluarneqarpoq:
- Qaqortumi angajoqqaarsianut aliasuuteqarneq annaasaqarnerlu pillugit saqqummiusseqqammerpugut, tamanna angajoqqaarsiaasunit tigulluarneqarpoq. Qaammatikkaartumik angajoqqaarsiaasunut ilisimasassaannik atorluarsinnaasaanniillu qulequtalerluta saqqummiisassaagut, matumanilu sammisat misigissutitsigut qaffakaatinneqarsinnaasut annertuut sammineqanngippata Narsami Nanortalimmilu angajoqqaarsiaasut attaveqaatitigut peqataasinnaasassapput, Kommune Kujallermi angajoqqaarsianut siunnersorti Nauja Ottosen Knudsen nassuiaavoq, nangillunilu:
- Aliasuuteqarneq annaasaqarnerlu pillugit Qaqortumi saqqummiussinitsinni sammisaq misigissutitsigut mianernartuummat onlinekkut peqataatitsinngilagut, upernaamulli Narsamut Nanortalimmullu angalanissarput iluatsillugu saqqummiukkumaarparput, Nauja Ottosen Knudsen oqarpoq.
Angajoqqaarsianut siunnersuisartut nutaat marluk
Angajoqqaarsiaasut nalornissuteqarunik siunnersorneqarnissaminnillu kissaateqarunik sapaatip-akunneranut marloriarlutik, ataasinngornermi sisamanngornermilu, saaffiginnittarsinnaapput.
- Massakkut angajoqqaarsialerisut marluulerneranni iluarpoq aaqqissuussinerit assigiinngitsut ataavaartumik ingerlasussat ukiumut pilersaarusiorsinnaangorsimagatsigit. Angajoqqaarsiaasartut sakkussaminnik immaqaluunniit nalorninermi, imaajarneqarnissamilluunniit pisariaqartitsinermi saaffiginninnissaat siunnersortissinnaanissaallu pingaartipparput. Ataavartumik ingerlasussamik ataasinngornikkut sisamanngornikkulluunniit oqarasuaatikkut ornigunnikkulluunniit saaffiginnissinnaalerneq periarfissiissutigaarput, neriulluta atorluarneqassasoq, Kommune Kujallermi Meeqqanut ilaqutariinnullu suliassaqarfimmi pisortaq, Ivalu Lund Hammeken oqarpoq.