peqqinnissaqarfik
Angajoqqaat meeqqamik mobiilerpallaannginnissaat isumagissavaat
Meeqqat tangiartuisartumut qungatsimikkut anniarlutik saaffiginnittartut amerliartorput. Mobilerneq killilerneqartariaqartoq, peqqinnissaqarfik kaammattuivoq. Erseqqissumilli piffissaliinissaq angajoqqaajusut ajornakusoortippaat
Mobilerujoorneq meeqqanut takornartaanngilaq.
Meeqqalli skærmilerivallaarnertik peqqissutsimut akornutigisinnaavaat. Tangiartuisartormi qungatsikkut ippigisaqartunik aatsaat taama amerlatigisunik saaffigineqartarlerpoq.
Taamaammat issiaannarluni skærmimik sammisaqarujoorneq killilersorneqartariaqartoq peqqinnissaqarfik isumaqarpoq. Tiimilli minutsillu qanoq amerlatigisut atorneqartanissaat eqqaaneqanngilaq.
- Angajoqqaarpassuit qanoq sivisutigisumik meeqqatik skærmilerisinnaaneri paaserusuppaat, Lisa von Huth Smith, peqqinnissaqarfimmi immikkut siunnersuisartoq oqarpoq.
- Misissuineq kaammattuteqarnittalu toqqammavia nutaajummat oqaatigisinnaangikkallarparput.
Meeqqat inuusuttullu tallimat 19-llu akornanni ukiullit tangiartuisartumut saaffiginnittartut 60 procentimik amerleriarsimapput, ukiullu qulit ingerlanerini 30.000-nut qaffassimallutik. Danmarkimi naatsorsueqqissaartarfiup kisitsisaatai malillugit Politiken paasissutissiivoq.
Meeqqat niaqqorisarput, qungatsimikkut qitimikkullu anniarlutik. Tamannalu qungaseq peqingatillugu inissisimatittarneranit pissuteqartoq atorfilittat isumaqarput.
Inersimasunngoraanni aatsaat ippigineqartartut meeqqat akornini takussaalersimasoq Danskit tangiartuisartut siulittaasuat Tina Lambrecht oqarpoq.
- Meeqqat aalanngippallaartut tangiartuisartut isumaqarput. Tamannalu allanngortittariaqarpoq. Angerlarsimaffimmi atuarfinnilu timertik atorlugu aalanerulernissaannut ikiortariaqarpagut, oqarpoq.
Siulittaasulli peqqinnissaqarfik assigalugu qanoq sivisutigisumik meeqqat mobilertarnissaat erseqqissumik oqaatigisinnaanngilaa.
- Angajoqqaajusut tamanna nammineq aalajangiiffigisariaqarpaat.
Angajoqqaalli meeqqaminnut qaqugukkut mobilimik arsaarinnittassanersut aamma killileruminaappoq.
Angajoqqaat nuna tamakkerlugu peqatigiiffianni siulittaasoq Dorthe Boe Danbjørg oqarpoq. Taanna pingasunik, arfinillit aqqaneq-marlullu akornanni ukiulinnik, qitornaqarpoq.
- Angajoqqaajusugut pimooruttariaqarparput. Erseqqissunillu malittarisassaliornissaq ajornakusoorpoq, meeqqammi mobilinik tabletinillu atueriaasaat assigiinnginnamik.
- Soorlu aasaq manna pinnguaat Pokemon Go atorlugu meerarpassuit aneertarput. Tassanilu timertik atorluarlugulu silaannarissartarput.
- Meeqqalli inoqatiminnik soqutiginnikkunnaarlutik qungatsimikkut akornuteqartalernerat aarlerinarpoq, angajoqqaat peqatigiiffianni siulittaasoq oqarpoq.
Atuineq annertuallaaqqunagu taassuma meeqqani killilersortarpai. Mobililli tabletilluunniit sumut atorneqarnersoq apeqqutaatillugu.
- Aasarmi Pokemon Go pissutaalluni atuinerat killilersunngilakka. Unnukkummi pisuttuaqatigisarpagut.
- Uninngaannarlunili atorneqassappat killilersuisarpunga. Pinnguaammulli atorneqarpat ajorinngilara, Dorte Boe Danbjørg nassuiaavoq.
Kattuffik Red Barnet piffissaq qanoq annertutigisoq skærmip saani atorneqassanersoq erseqqissumik kaammattuuteqarput. Ullormut annerpaamik pingasut tungaannut ukiulinnut minutsit 35-t. Sisamat arfineq-marlullu akornanni ukiulinnut minutsit 30-t 60-llu tungaannut. Tiimit marluk tungaannut arfineq-marluk qulillu akornanni ukiulinnut.
/ritzau/