Angalanissamut pilersaarut quianaannartoq
Kulusummiit Ittoqqortoormiinut timmisartorneq Nuuk, København Reykjavíkilu aqqusarlugit ullunik sisamanik sivisussuseqartoq – maannali Naaja Nathanielsen pitsannguinissamik neriorsuivoq
Kalaallit Nunaanni sunaluunniit oqitsuinnaanngilaq – ingammik Tunumi coronamik ajornartoornerup nalaani timminissamik ikinnerusunik eqqugaasumi.
Eqqugaaneq sakkortoqaaq inuunerlu akisunerulerlunilu ajornakusoorneruvoq, taamaattumik maanna naalakkersuinermik suliaqartunut ikioqquvugut, Ittoqqortoormiinit Mette Hammeken pitsaanerusumik timmisartuussisarnissamut atsiornernik katersinermik aaqqissuisoq oqaluttuarpoq.
Angalanissamut pilersaarut takisooq
Taamaaliorpoq tusaramiuk Ittoqqortoormiini innuttaasut ilaat Tunumi kujasinnerusumi Kulusummi aasaanerani feeriarsimasoq. Angerlartussanngormata angalanissamut pilersaarutaat ima isikkoqarpoq:
Kulusuk-Nuuk
Nuuk-Kangerlussuaq
Kangerlussuaq – København
København – Keflavik
Keflavik – Reykjavik
Reykjavik - Akureyri
Akureyri – Nerlerit Inaat
Nerlerit Inaat – Ittoqqortoormiit
Kulusummiit Ittoqqortoormiinut narlumuinnaq timminissaq 830 kilometerinik takissuseqarpoq. Air Greenlandip timmisartunit Dash-8-nit akunnernik marlussunnik timmiffiusinnaasoq – pisariaqartumillu Nerlerit Inaanni Bell 212-imut nuuttariaqarluni akunnernik sisamaniit sivikinnerusumik ingerlanneqarsinnaalluni – angalanissamut pilersaarut malillugu ulluni sisamaniunngitsoq.
Ukiup affaanik utaqqisariaqarneq
Mette Hammeken allamik assersuuteqarpoq, soorlu napparsimasoq 72-inik ukiulik januaarip 21-ani Rigshospitaliliartinneqartoq, juulillu 14-ani suli Nuummiittoq Ittoqqortoormiinut uternissaminut utaqqilluni.
Mette Hammekenip siunnersuutigaa pingasunik teqeqqulimmik timmisartuussisoqarnissaa, Nuuk – Kulusuk - Nerlerit Inaat – Nuuk imaluunniit aamma Island – Kulusuk – Nerlerit Inaat – Island.
Ajorluinnarpoq, taamaattumik maanna piumasaraarput arlaanik pisoqarnissaa, Mette Hammeken atsiortitsinermut 85-init atsiorneqartumut ilanngullugu allakkamini allappoq. Allagaq juulip 16-ani allagaavoq ilaatigut Coronamut allattoqarfimmut, Naalakkersuisunut, Kommuneqarfik Sermersuumut kiisalu naalakkersuinermik suliaqartunut arlalinnut tusagassiuutinullu.
Naaja pitsannguutissanik neriorsuivoq
Maanna Mette Hammeken ilaatigut attaveqarnermut Naalakkersuisumit Naaja Nathanielsenimit akissuteqarfigineqarpoq, taassuma nassuerutigalugu maannakkut Tunumi attaveqarneq naammaginanngitsoq:
Kulusuuk Ittoqqortoormiillu akornanni angalanissamut pilersaarut pineqartoq Københavnikkoortoq naammaginanngilaq, Naalakkersuisoq allappoq, coronamik nappaalanermik pisut nassuiarlugit.
Naaja Nathanielsen neriorsuivoq pitsannguisoqarumaartoq.
– Maannakkorpiaq Naalakkersuisut ataavartumik aaqqiissutissamik sulissuteqarput, Tunumut, Tunumiit Tunumilu angallannermik pitsanngusinnaasumik. Aaqqiissutissat piaartumik saqqummiunneqassapput, Naaja Nathanielsen oqarpoq, neriuutigalugu Tunumi innuttaasut periarfissat nutaat ilassilluarumaaraat.