Angalasimasut angerlarsimaannarlutillu misissortissapput
Inuit arlallit oqartussanit kaammattorneqarput, sapaatip akunnerani siusinnerusukkut tunillatsissimasumik ilaaqateqarlutik timmisartumik qulimiguulimmillu angalasimasut angerlarsimaannaqqullugit misissorteqqullugillu.
Inuit ilaat timmisartunut arlalinnut qulimiguulimmullu ataatsimut ilaasimallutik coronamik tunillatsissimapput. Taamaammat tuniluuttoqalersinnaanera pinngitsoortinniarlugu taakku ilaasimasut tamarmik kaammattorneqarput angerlarsimaannaqqullugit piaarnerpaamillu misissorteqqullugit.
Ataasinngornermit juulip aqqaneq-aappaani ukununnga ilaasimasut matumani pineqarput
o Qaqortoq-Narsarsuaq Qulimiguulik GL356
o Narsarsuaq-Nuuk timmisartoq GL416
o Nuuk-Sisimiut timmisartoq GL258
Tallimanngorpamuugallartoq malittarisassaritinneqalersut uku marlunngormat atuuttussanngortinneqarput:
Tamanik angallassisarfinni qanermut assiaquteqartoqassaaq. Tassa timmisartuni, umiarsuarni, bussini taxanilu.
Inini kikkunnit tamanit iserfigineqarsinnaasuni aamma qanermut assiaquteqartoqassaaq, soorlu pisiniarfinni.
Bussinik angallassisarneq killilersorneqarpoq, tassa bussini issiaviit ulikkaaraanngata allanik ikisoqarsinnaajunnaassaaq.
Katersuunnermi killilersuisoqalerpoq, tassa qatserisartoqarfinni oqartussaasunit akuerineqarsimasunut isersinnaatitaasut amerlanerpaaffissaasa affaannaat isersimaqqusaalerlutik. Kikkut tamarmik iserfigisinaasaanni amerlanerpaamik inuit 20-t isersimasinnaalerput, tassani pisiniarfiit nerisassanik nioqquteqartartut ilaatinneqaratik.
Cafeet, neriniartarfiit imerniartarfiillu amerlanerpaamik 20-nik isersimasoqarsinnaapput. Aamma imerniartarfiit silataanni 20-t kisimik isssiasinnaatitaapput.
Nunamut tikittut katsersuuttoqarneranut peqataaqqusaanngillat.
Naalakkersuisut tuniluuttoqarnerata tunillatsissimasinnaasunillu ujaasinerup maanna inissisimaffii paasissutissiissutiginiarlugit sisamanngornermi aqqanernut tusagassiortunik katersortitsissappu. Killilersuutit sivitsorneqassanersut sukateriffigineqassanersulluunniit pillugit suli nalunaaruteqartoqanngilaq.