Angallat nunatsinneersoq Sullualukkut sukkanersaavoq

Piffissami matumani New Zealandimi angalanerit nuannarineqarnersaat tassaavoq hobittip Bilbo Sækkerip angalanera, nammineq taasani "Aallarluni angerlaqqillunilu" - imaluunniit oqaluttuamik tamatuminnga New Zealandimi pisuutinneqartumik filmimik ilitsersuisartup Sir Peter Jacksonip filmiliarissallugu pilersaarusiaa. Angalanerli alla kiwit nunaanni tusagassiorfinnit aamma sammineqartorujussuuvoq.

Ullumi Graeme Kandall angallammik Aucklandimut tikippoq, kisimiilluni nunarsuaq kaajallallugu Sullualuk aqqusaarlugu angallammik tingerlaatilimmik 12,5 meterimik takissusilimmik "Astral Espress"-imik angalareerluni.

Taanna tikikkami tikilluaqquneqarpoq ikinngutinit, ilisarisimasanit New Zealandimilu tusagassiortorpaalunnit Ikinngutit ilagaat angallatip piginnittua Edward Niclasen Nuummeersoq - angallatillu aquani nunatta erfalasua erfalavoq. Ilaqutariit Niclasenikkut aallaqqaammut quiasaarutigalugu eqqaasarsimasaat, tssa New Zealandimukarlutik Graeme angallammik tikikkiartortoq aalateriffigiartorniarlugu - piviusunngorpoq.

Siullermeerunarpoq angallat Kalaallit Nunaanni nalunaarsortissimasoq Aucklandimi umiarsualivimmut tikinnera. Astral Express-imilli kalaallit angallataannik siulliusoqarsimgaluarpalluunniit tamanna angalanerup immikkut illuinnartup naggaserneraa.

Graeme Kendal Astral Expressimik nunarsuarmi rekordiliisimavoq: Umiartortuni taassuma passage sukkanerpaamik atuarsimavaa.

Nunarsuup kaajallannerani sømilit 27000-it angalavai - nunarsuup kaajallannerani aqqut takinerpaaq..

Sullualummik aaqusaarinninnera aallartereerpoq apriilip 26-ianni - 2005-imi, taamanikkulli angalaneq kipitinneqarpoq Davisstrædetimi Qeqertarsuup avataani, kisimiilluni unissanani qaammatini sisamani ullunilu malrunni angalareerluni, tamatumani Graeme Kendallip 18.000 sømilit sinnerlugit angalasimallugit. Tamaangaannaq killittariaqarsimavoq ukioq taanna Sullualuk sermimik matuneqarsimammat.

Astral Ekspress kalaallinit pigineqalerpoq

Graeme Nuummut uterpoq, tassani angallat Edward Niclasenimit pisiarineqarluni taamalu kalaallinit pigineqalerlni. 2006-imi Edward Niclasen pingasunik inuttaqarluni, ilaatigut ernini Niclas, Atlantikoq ikaarlugu Savalimmiunut angalavoq - savalimmiormiut tingerlaataannarsortuisa Kalaallit Nunaata eqqaani aalisariarlutik tikittut siulliit tikinnerannit ukiut 100-unngortorsiornerat nalliussiniarlugu.

2008-mi Savalimmiunit Shetlandsøerne Norgelu aqqusaarlugit Danmarkiliarpoq. 2010-mi Niclas angallatinik sukkaniunnermi "Sjælland rundt"-imi angallammik taassuminnga peqataavoq, tamatumalu kingorna Shetlandsøerne Savalimmiullu aqqusaarlugit Nuummukarluni. Savalimmiuni Graeme ikivoq, tamatumalu kingorna Vestmannaøerne aqqusaarlugu Prins Christians sund atuarlugu nunatsinnukarlutik.

- Astral Ekspressimik nuanneqisunik angalasimavugut puigunngisaannagasannik. Nunap Isuata eqqaani anorersuarsiorluni allaanngilaq immeraaffimmiilluni, Atlantikup avannaani qatsunganersuarmut arferit sinittut akornanni, ukioq mannalu Prins Christianssund aqqusaarlugu. Nunarsuarmi kangerluarsuit kusanarnersaasa ilagigunarpaat, Edward Nielsen oqarpoq.

Edward Niclasenip ukiuni tamani Graeme Kendall attaveqarfigisarsimavaa, Graemelu aperimmat rekordiliiniarluni angalanermini angallat atorsinnaanerlugu Edward ingerlaannaq akuersiboq. Sinnattuni taanna Graemep atussavaa, angallalli kalaallit erfalasuannik atorluni angalassaaq.

Franklin Strædetimi neriniartarfik

2010-mi Graeme Kendallip Sullualukkut angalanini nangippaa aggustip 18-ianni Nuummit aallarluni. Aggustip 27-ianni passage aqqusaarlugu aallartippoq, Qeqertarsuaq saneqqullugu uuliamillu misileraalluni qillerisut ingalassimalluarlugit angalalluareerluni. Passage aqqusaarlugu angalaneq Lancaster Sundimiit Point Barrowimut ullunik 12-iinnarnik sivisussuseqarpoq, naatsorsuutigineqarporlu manna tikillugu aatsaat taama sukkatigisumik taanna angalaneqartoq.

Graemep passagekut angalanermi arfinerit, aarrit issittullu timmiai kisiisa naapinngilai. Sullualukkoornermini franskeq misigisassarsiortartoq Mathieu Bonnier ikiorpaa, taassuma pilersaarutigisimallugu passage-koornissani umiasuaq ipusersortargaq immikkut sanaaq atorlugu - qimmini ilagalugu.

- Unnuit tamaasa qimmini imaani nalutsittarpaa. Aallaaseqarpoq qimmeq nannumit neriniarneqalissagaluarpat, Edward Niclasen oqaluttuarpoq.

Graemep iputersortoq qasoqqasoq ikivaa kissartunillu nerisassiuullugu. Mathieup kingorna Astral Ekspress taasarsimavaa "Franklin Strædimi neriniartarfiga". kinguninnguali Mathieup angalanini ajoraluartumik unitsiinnartariaqarsimavaa.

Passage ammasimavoq sulili kassuppassuaqarluni Angallatip sikorsuarnik naapitsineq anigorpaa:

- Iterpunga sikorsuit angallat apormassuk. Nipaa allaanngilaq sikorsuit angallat aseruillugu aseruleraat. Tupaqaanga eqqarsarlungalu - tassa tamaanga killeqarpoq. Sikorsuarnilli anillaakkama takuara angallat immannguaannaq malussarsimasoq. Angallat sinngusuujuvoq, Graeme Kendall oqaluttuarpoq.

Mount Everestimik qasinermut assersuupaa

Point Barrow Aleuternelu uiareerlugit Graeme anorersuarsiulerpoq sapaatip akunningajaanik sivisussusilimmik. Sapaatip akunnera sivisooq tamaviaarnartorlu, ullut unnuallu 12-it sinippianngereersimalluni. Tamatuma kingorna Manerassuakkoorpoq Hawaii saneqqullugu. Ækvatorip qaangernera Graemep nalliussivaa immiaaraatini kingulleq imerlugu.

Fijiøerne saneqqullugit angalanerup immikkoortua kingulleq ingerlalluarpoq ullullu 71-it imaaneereersimalluni aggustip 27-ianni kiisami Aucklandimi umiarsualivimmut tikippoq.

Sullualuk ukiualunnguaannarni angalaffigineqarsinnaalersimavoq ukiumullu qaammatit qulit sinnerlugit suli sikoqartarluni. Piffissami sivikitsuinnarmi aggustimi-septembarimi aqqusaarneqarsinnaavoq. Taamaattumik Nordvestpassage sumiiffiit kingulliit ilagaat kisimiilluni angalasumit suli aqqusaarneqarsimanngitsoq.

Taamaattumik Graeme Kendallip passage-kut kisimiilluni angalanera New Zealandimi tusagassiorfinnit sanilliunneqarpoq Sir Edmund Hillaryp, aamma new zealandimiuusup, imaluunniit imminut taasarnermisut kiwi-p, ukiut 57-it matuma siornatigut Mount Everestimik qaqisineranut. Soorlu nammineq oqartoq: "Inuuneralu naallagu imaani angalasarsimavunga uannullu nunarsuaq ammalortuuvoq. Kingumut qiviarnianngilanga aperalungalu - sooq kaajallanngiliuk?".