Angallattunik misissuinermi politiit tupaallapput
Ilulissani aqqusinermi angallattunik misissuisoqarpoq. Politiit tupaallaatigaat meeqqat taama amerlatigisut isumannaarsuummik qiteruteqartinneqanngimmata – allaat ilaat meeqqami sarliarlutik biilertarput
Ilulissani politiit aqqusinermi angallattunik misissuinerat tallimanngormat nalunaaqutaq 15.30-p aamma 18.10-p akornanni pivoq. Piffissami tassani biilertut 20-it akiligassinneqarput. Meeqqat isumannaarsuummik qiteruserneqartannginnerat amerlasuut iluarsisariaqarpaat.
- Ukiup affaata missaa matuma siorna aamma taamatut angallattunik misissuivugut taamanilu paasivarput amerlasuut qiterut isumannaarsuut atunngikkaat. Taamaattumik assut tupaallaatigaarput taama amerlatigisut qiterut isumannaarsuut suli atunngimmassuk – pingaartumillu meeqqat qiterusernissaat pikkoriffigineqarnerusariaqarpoq, Ilulissani politiini vicepolitikommissær Karl Vinther Sermitsiaq.AG-mut oqarpoq.
Misissueqqissapput
Aqqusinermi angallattumik tallimanngormat misissuineq nalunaaquttap akunnerini ikittuinnarni pivoq. Tassani biilit 80-it unitsinneqarput taakkunanngalu 20-it akiligassinneqarpoq aqqusinermi angallannermi inatsimmik unioqqutitsisimasutut.
- Qiterut isumannaarsuut eqqarsaatigalugu inuit eqqarsaqqissaarnerusariaqaraluarput. Biilertummi arlallit aamma unitsippagut meeqqamik sarliarlutik ingerlatitsisut – ilisimasariaqarpaat isumannaarsuummik qiteruteqarani biilerneq ulorianartorujussuusoq, Karl Vinther oqarpoq.
Aqqusinermi angallattunik misissuinerit akuttunngitsumik ingerlattarniarlugit Ilulissani politiit pilersaarput.