Angerlaanneqartussat angerlaanneqanngitsoortut: »Sooruna susoqarneq ajortoq?«
Inuussutissalerinermut oqartussaaffiup tamakkiisup Nunatsinnut nuunneqarnissaa nutaamik ilungersuutigineqaqqilerpoq, taakkununnga ilaallutik pingaaruteqarluinnartut aalisakkat qaleruallillu nunanut allanut tunineqartartut. Angisuunilli ajutoorfissaqarsinnaavoq.
Aqqalu Jerimiassenip inuussutissalerinermut oqartussaaffiup Nunatsinnut nuunneqarnissaa pillugu Inatsisartuni sivisuumik oqallittoqareersorlu tuini kiviimiinnarpai anersaamillunilu.
Taamak allaaserinnippoq aviisi AG.
- Taama oqaluttoqartarnera ukiuni 10-15-ini tusartareerparput, tassa oqartussaaffiup tiguneqarnissaanut piffissanngortoq. Taamaattorli susoqarpa? Susoqanngilaq, Atassutip siulittaasua oqallittoqareersorlu AG-mut taama oqarpoq.
Siumut erseqqissunik oqaaseqaraluarpoq. Partiip oqaaseqartuata Lars Poulsenip, suliassaq nukinginnartutut taavaa. Tamanna Inatsisartuni oqaluttarfimmit oqaatigaa:
- Ilumoorsinnaanngilarmi niuernitsinni siumut utimullu Danmark tamatigut aqqusaaqqaartuassagutsigu. Tamakkununnga tunngasut nammineerluta isumaqatigiissusiorfigissavavut. Pisuussutitta uumassusillit sapinngisamik tunisassiassatut piareerlugit tunisassiarinissaat tamatta kissaatigaarput. Tamatumani nunani sanilerisatsinni misilittakkat iluaqutiginiarneqarsinnaapput, nunatullu immitsinnut aallaavigaluta inatsit suliaralugu. Inuussutissalerinermut oqartussaaffik piaarnerpaamik Nunatsinnit isumagineqalertariaqarpoq.
Pipallatamik tigusisoqassanngitsoq
Inuussutissalerinermut tunngasut qitiulluinnartumik inissisimapput. Nunatta aalisakkat qaleruallillu nunanut allanut tunisartagai ukiumut 5,9 milliardit koruuninik naleqarput; taakku naalagaaffiup ukiumoortumik ataatsimoortumik tapiissutigisartagaannit 2 milliardit koruuninik amerlanerupput.
Siumut isumaqaraluartoq nunanut allanut tunisartakkat nammineerluni isumagisarilernerisigut isertinneqartartut amerleriarumaartut, allat malittarisassat pisariusut pissusissamisuunngitsumik isumagineqalernerisigut nunanut allanut tunisisarnerup akornuserneqarsinnaanera ernumanartoqartippaat.
Taama ernummateqartut Aqqalu Jerimiassenip isumaqatigai.
- Pipallatamik tigusinissarput pinaveersaartariaqarparput. Tamakku toorlattumik suliarineqassanngillat. Taamaattumik kingunerisassai sukumiisumik qulaajarneqartariaqarput, Jerimiassen oqarpoq.
Taanna Inatsisartuni apeqquteqaat aallaavigalugu qanittukkut oqallinnissamut siunnersuuteqartuuvoq, eqqaasitsissutigalugulu partiinit Naalakkersuisut 2019-imili pisussaaffilerneqarmata tigusinissaq pillugu nalunaarusioqqullugit. Suliassap taama isumagineqarnissaanut Inatsisartut tapersersuinerat taamanikkut angeqaaq. Allaammi naggataagut allannguutissatut siunnersuut toqqaannartumik tigusisoqarnissaanut tunngasoq akuersissutigineqarluni.
- Naalakkersuisulli suliassaq 2019-imi suliakkiissutigineqartoq ajoraluartumik naammassisinnaasimanngilaat. Ajoraluartumik ingerlariaqqissimanngilagut, Aqqalu Jerimiassen Inatsisartuni nutaamik oqallittoqarnissaa aallarnerlugu taama oqarpoq.
Allaaserisap sinnera aviisimi AG-mi atuaruk:
