Angerlarsimaffeqanngitsoq unnuisarfimmut iseqqusaajunnaartoq: – Nammineq isumagisariaqarputit
Nuummi angerlarsimaffeqanngitsut amerlinissaatnaatsorsuutigineqartoq, Kommuneqarfik Sermersooqnaliliivoq.
Minik ukiuni arfineq-marlunni angerlarsimaffeqanngilaq, Nuummilu unnuisarfimmi siusinnerusukkut unnuisarsimalluni. Maannali unnuisarfimmut piffissaligaanngitsumik iseqqusaajunnaarpoq, unnuisarfimmi malittarisassat unioqqutissimagamigit. Taassuma oqaatigaa, tamatumunnga patsisaasoq festereernermi kingorna imigassarsunnissimalluni, tamannalu unnuisarfimmi inerteqqutaasoq.
Taamak allaaserinnippoq aviisi Sermitsiaq.
Pineqartup Minik aterivinngilaa, siunissami suliffittaarsinnaanini eqqarsaatigalugu kinaassutsiminik isertuusserusukkami. Angutip eqqortumik aqqa aaqqissuisoqarfimmit ilisimaneqarpoq.
Johanne Davidsenip, Nuummi Qapiarfiusaami inissiami najugaqartup, sapaatip akunnerani kingullermi aviisimi oqaluttuaraa, inissiarsuarmi najugaqarfimmini majuartarfinni unnuisartut amerliartuinnartut. Angerlarsimaffeqanngitsut ikiorneqarnissaat taassuma ujartorpaa, taakkumi imigassamik aanngajaarniutinilluunniit atornerluisuunertik isumaliortaatsimikkulluunniit nappaateqarnertik pissutigalugu unnuisarfinneeqqusaanngimmata.
– Pissutsit atukkakka pillugit oqaluttuunnissaat ajornakusoortippara, Minik eqqissisimalluni oqarpoq.
Januaarip naaneranili iseqqusaajunnaarnermi kingorna majuartarfinni kiassakkani sinittarpoq. Januaari Nuummi ukiup nillernerpaaffiatut isigineqartarpoq, 25-nik issittarami. Ingammik unnuakkut nillertaqaaq, Minik nassuiaavoq.
Allaaserisaq tamaat aviisimi Sermitsiami atuaruk.
