Angerlarsimaffeqanngitsut amerlineri Naalakkersuisut isumakulunnartippaat
Angerlarsimaffeqanngitsut amerligaluttuinnarnerat Naalakkersuisut isumakulunnartippaat. Paragraf 37 atorlugu Suleqatigiissitsisuneersumut Tillie Martinussenimut akissuteqaammi tamanna atuarneqarsinnaavoq.
Isumaginninnermut Naalakkersuisoq, Martha Abelsen, paragraf 37 atorlugu akissuteqaammini Kalaallit Nunaanni angerlarsimaffeqanngitsut amerliartorneri isumakulunnartuusoq allappoq. Inatsisartut upernaakkut ataatsimiinnermi 2019-imi inassuteqarnerat malillugu ajornartorsiutip qanoq annertutiginera pillugu Naalakkersuisut maanna qulaajaallutik suliaqarput.
- Taamaammat qulaajaaneq kisiat pineqassanngilaq. Suliassaqarfimmi ilisimasallit peqatigalugit "sukumiisumik nalunaarsuinernik" (hvidbog) / suliniutissanullu aalajangersimasunut innersuussutinik, angerlarsimaffeqanngitsunut suliniutitut aallartinneqartussaasunut, ajornartorsiummullu pitsaaliuinissaq pillugu suliaqartussat pillugit suliap aallartinnissaa pilersaarutigineqarpoq, akissutigineqarpoq.
Angerlarsimaffeqanngitsut 878-it
Kalaallit Nunaanni angerlarsimaffeqanngitsut pillugit kisitsisit kingulliit 2017-imeersuupput, tassanilu Naalakkersuisunit nalunaarutigineqarpoq angerlarsimaffeqanngitsut katillugit 878-iusut. Martha Abelsen naapertorlugu kisitsit ukiualunni kingullerni annertunerulersimavoq.
Kalaallit Nunaanni angerlarsimaffeqanngitsut pingasunut agguataarsimapput:
- Inuit unnuakkut aalajangersimasumik sumiiffissaqanngitsut.
- Inuit angerlarsimaffimminniit anisitaasimasut, taamaattumillu inissiigallartarfimmiitinneqartut.
- Inuit namminneq angerlarsimaffeqannginnertik pissutigalugu allani innisimasut.
Ineqarnermut akiligassaqarneq
Martha Abelsen ilisimatitsivoq ineqarnermut akiligassanik akiliinngitsoortarneq pissutigalugu ukiuni kingullerni angerlarsimaffeqanngitsoqalertartoq. Akiitsut pillugit siunnersorneqartarneq Kommune Kujallermi misiliutaasimasoq ima iluatsilluarsimatigaaq, taama suleriuseqarneq maanna nunamut tamarmut siammarneqarsimalluni. Pisortat ikiorsiisarnerannut inatsit aamma aaqqissuusseqqiffigineqalersimavoq.
- Pisortanit ikiorsiissutinut inatsit nutarterneqassaaq, aalajangersimasumik angerlarsimaffeqanngitsut ikiorneqartalerniassammata.
- Angerlarsimaffeqanngitsut pisortanit ikiorserneqartut malitsigisaanik piginnaanngorsarneqarnermik suliniummut peqataatinneqartalissapput.
Angerlarsimaffeqanngitsut siunissami ikinnerulertariaqarput, taamaammat qulaajaanermi kommunit piffissami qaninnermi peqataatinneqalissasut, isumaginninnermut naalakkersuisoq ilisimatitsivoq.