Angerlarsimaffeqanngitsut pillugit oqalliffimmi siullermeerluni naapittoqarpoq

Nuna tamakkerlugu angerlarsimaffeqanngitsut pillugit oqallittarfimmi pilersinneqaqqammersumi ataatsimiinneq siulleq ingerlanneqaqqammerpoq. Tassani suliani mmisilittakkat suliaqaqqinnissamullu kissaatit oqaluuserineqarput. Isumaginninnermut suliffeqarnermullu Naalakkersuisup, Mimi Karlsenip (IA) peqataasoqarluarnera nuannaarutigigaa, Namminersorlutik Oqartussat tusagassiorfinnut nalunaaruteqarlutik allapput.

- Angerlarsimaffeqanngitsuuneq pillugu oqalittarfiup nukittoqutigaa ulluinnarni angerlarsimaffeqanginneq pillugu aalajangersimasumik suliaqartut amerlasuut sinniisorineqarmata. Siunnersuutitsialaat isumassarsiatsialaallu saqqummiunneqartut tusarnaassavakka nalilersorlugulu qanoq innuttaasutsinnut tigussaasumik aaqqiissutissat timitalerniarnerlugit, Mimi Karlsen tusagassiorfinnut nalunaarummi oqaaseqarpoq.

Oqallittarfimmi peqataapput angerlarsimaffeqanngitsuuneq pillugu suliaqartut, innuttaasunik angerlarsimaffeqanngitsunik imaluunniit angerlarsimaffeerunnissamut aarlerinartorsiortunik qanimut sullissisut, namminersorlutik oqartussat ilisimatitsipput.

Angerlarsimaffik siulliullugu

Oqallittarfimmi kommuninit, A/S INI-mit, politiinit, Peqqinnissaqarfimmit, Allorfimmit, Kofoeds Skolemit, Pinerluuteqarsimasunut Isumaginnittoqarfimmit, Isumaginninnermut Aqutsisoqarfimmit aammalu Namminersorlutik Oqartussani pisortaqarfinnit arlalinnit peqataaffigineqarpoq.

- Peqataasut tamarmik soqutiginnilluarput akuulluarlutillu, aamma angerlarsimaffeqannginneq pillugu ajornartorsiutit qaangerniagassallu amerlasuut saqqummiunneqarlutik. Maannakkut suliassarilerparput peqatigiilluta, innuttaasunut eqqugaasunut aammalu angerlarsimaffeqannginnermik eqqugaasunut ikiorsiissutaasinnaasut, aaqqiissutissat tigussaasut oqaloqatigiissutiginissaat sulissutiginissaallu, isumaginninnermut suliffeqarnermullu Naalakkersuisoq oqarpoq.

Nuna tamakkerlugu angerlarsimaffeqanngitsut pillugit oqalliffik 1. december naapeqqissaaq. Ataatsimiinnermi Housing First, tassa angerlarsimaffeqanngitsut siullermik initaarteqqaariarlugit ajornartorsiutaannik aaqqiiviginninnissamut suliniuteqartarneq, oqallisigineqassaaq. Housing First nunani avannarlerni kommunit arlallit ingerlattareerpaat.

Nunatsinni angerlarsimaffeqanngitsut 841-sut 2017-imi naatsorsorneqarsimavoq. Maanna qassiunersut ilisimaneqanngilaq, Naalakkersuisulli siuliisa naatsorsuuppaat maanna amerlanerussasut.