Angerlarsimaffimmi nakuusertarneq iliuuseqarfigineqassaaq: »Arnat nunamit qimaasariaqartarput«
Nakuuserneq atugaasorujussuuvoq, politikerilli angutit nipertik nipittuinnarlugu arnanik nipangersitsisartut akueriumanngilluinnarpaat. Aamma Imigassap inerteqqutigineqalersinnaanera eqqartorneqarpoq, taavalu aamma »angutit nakuuserfigineqarsimasut eqqarsaatigineqassapput«.
Agathe Fontain (IA) aperigaanni, taava ileqqorissaarneq naleqartitallu illuariarujussuarsimapput, angerlarsimaffimmi nakuusernernik nalunaarutiginnittarnerit amerliartuinnavimmata. Aviisi AG allappoq.
- Nakuusernermut utoqqatsissutissaqanngilaq, aalakoorsimagaluaraanni, sangiassimagaluaraanni akerlilerneqartarnerluunniit sungiusimanngikkaluaraanni; naamivik, nakuusersimanermut sumilluunniit utoqqatsissutissaqanngilaq, Fontain oqarpoq, sammisaq tamanna Inatsisartut akunnerni marlunni oqaluusereqqimmassuk, taannalu politikkikkut arlalissuariarluni oqaluuserineqartarsimavoq, sulili nunatsinni naalliuutigineqartorujussuuvoq.
- Politiit 2021-mut ukiumoortumik nalunaarusiaanni takuneqarsinnaavoq nakuusernerit 1.348-t nalunaarutigineqarsimasut. Pisunit taakkunannga 435-ni meerartaqartarsimavoq. Nakuusernermik nalunaarutiginninnerit ukiorpassuanngulersuni amerliartuinnarsimapput, tassa imaappoq arnanut nakuusertarnerit amerliartorput. Ima ingasatsigilersimavugut arnanut nakuusertarneq akuerisaalersimalluni? Nakuuserit sungiutiinnarsimavavut? Nakuuserneq akuerineqarsinnaava?
Agathe Fontainip oqaluttarfimmit apeqquterpassuani nangippai, narrujuummeqalunilu nangippoq: Arnat isattarneqartarnerat, isimmitsarneqartarnerat oqaatsillu sakkortuut atorlugit saassunneqartarnerat akuerineqarsinnaanngilaq, ingammillu angutit nipertik nipittuinnarlugu arnanik nipangersitsisartut akuerineqarsinnaanngillat.
Allaaserisaq tamaat uani AG-mi pisiarisinnaasanni atuaruk: