Anguniagaq: Ukiumut savaaqqat 23.000-it toqorarneqartalissapput

Nunalerinermut Siunnersuisoqatigiit kingusinaarlutik ukiup affaanoortumik ataatsimeeqatigiipput apriilip naanerani.

- 2024-mi anguniakkat assigiinngitsut anguneqartussaapput, ilaatigut savaaqqat 23000-it toqorarneqassapput, ukiumut nersutaatit inaannik nutaaliaasunik ataatsimik marlunnilluunniit sanasoqassaaq. Inatsit nutarneqassapput, nunaateqarfimmik nutaamik tigusisinnaanissamik pilersitsisinnaanissamillu pisariinnerulerniassammat, Kalaallit Nunaanni Nunalerinermik Siunnersorteqarfiata allattoqarfia tusagassiutinut nalunaarpoq.

Ineriartorluartoqarpoq

2021-mi nersussuit 71-it, tuttut 190-it, savaaqqat 19322-t aamma savat 1403-t toqorarneqarput. Taakku saniatigut aamma namminersortut allat, soorlu Greenlandic Greenhouse, salaatinik Kalaallit Nunaanni neriniartarfippassuarnut tunisassiortunngornikuuvoq kiisalu Kalaalit Nunaata kujataani naatsiianik majroenik tunisassiortut ingerlatsipput.

- Nunalerinermi inuussutissanik tunisassiorneq pitsaasumik ineriartorpoq, kisiannili Nunalerinermut Siunnersuisoqatigiinnit takuneqarsinnaasutut nersutit toqorarneqartut amiinik qiviuinillu atuineq ineriartortinneqanngilaq, taakkulu ullumikkut ikuallanneqaannartarput, ilisimatitsissutigineqarpoq.

Siunnersuisoqatigiit Naalakkersuisunut siunnersortitut inissisimapput. Nunalerinermut Siunnersuisoqatigiinnit nunalerinermik inuussutissarsiuteqarneq pillugu siammasissumik isiginninniarnissaq kissaatigineqarpoq, nunalerinermillu aallussinermi aamma ilisimatusarneq, politikki takornariaqarnerlu pingaarutilittut inissisimassapput.

- Pingaartumik Kalaallit Nunaata kujataani suliniutit assigiinngitsut aammalu siunnersuisoqatigiit inissisimaffissatut kissaateqarnerisa akornanni suliat assigiinngitsut ataatsimut sunniuteqarnissaat pisariaqartinneqarpoq. Taamaattumik Nunalerinermut Siunnersuisoqatigiit ukiup affakkaartumik ataatsimiinnerit aamma Nunalerinermut Naalakkersuisup, Kommune Kujalliup borgmesteriata kommunalbestyrelsimilu ilaasortat ilaasa, Innovation South Greenlandip Inuili – Food College Greenlandip, Neqi A/S-ip, nersussuarnik kinguaassiortitsisut, tuttunik kinguaassiortitsisut, savaatillit aammalu nunalerinermik suliallit allat ataatsimeeqatiginissaannut atortarpaat, oqaatigineqarpoq.

Inerisaaneq

Nunalerinermut Siunnersuisoqatigiit nualerinermut attuumassutillit immikkoortuinik katersuuffiusussaapput, ullumikkut taamatut katitigaaneq atorlugu ingerlasinnaallutik, Siunnersuisooqatigiinni siulittaasoq Natuk Lund Olsen isumaqarpoq.

- Siunnersuisoqatigiinni assigiinngissitaarnerit kingunerisaanik siunnersuisoqatigiinni misileraanernut ataatsimiititaliamik pilersitsisoqarpoq, taassumalu nunalerinerup nutaaliorfiusumik misileraaffiusumillu ingerlanneqarnissaa misissuiffigissavaa. Taamatuttaaq inatsisinut ataatsimiititaliamik, nunalerinermut inatsisinik misissuisussamik, kiisalu niuernermut ataatsimiititaliamik, sulianik ingerlaavartumik isumaginnittuusumik pilersitsisoqarnikuuvoq. Nunalerineq siuariartorpoq aammalu nunalerinermut periusissiami anguniakkat pimoorussiffiusut soorunami aningaasaqarnermi aningaasartuuteqarnermik kinguneqartussaapput, Nunalerinermut Siunnersuisoqatigiinni siulittaasoq oqarpoq.

Tamatuma saniatigut Kalaallit Nunaata nunani avannarlerni suliniutinut ilaalernissaa soqutigineqartorujussuuvoq, tassanilu ilaatigut Savalimmiuni nunaatillit peqatigiiffiata Kalaallit Nunaata kujataanut tikeraarnissani eqqarsaasersuutigaa.