Anguniakkat: IA-p aamma Naleqqap pilersaarutaat aaku

Naalakkersuisooqatigiilersut IA aamma Naleraq isumaqatigiissumminni, tassani 'Nunarput nukittunerusoq naligiinnerusumillu atugaqarfiusoq' sulissutiginiarlugu isumaqatigiissuteqarput. Tassani siammasissumik politikkikkut isumaqatigiissusiortoqartarnissaa siunnerfiuvoq.

Suut pingaartillugit suliariniarnerlugit ilaatigut ima saqqummiussaqarput:

• Akileraartarnikkut aaqqissuusseqqinneq anguniarlugu aningaasaliineq
• Inissaaleqinerup annikillisarnissaa
• Peqqinnissaqarfiup eqaallisarnera
• Atugarissaarnerup appasinnerpaaffilernissaa
• Aalisarnermut inatsisissaq
• Ernereernerup kingorna atukkat pitsanngorsarniarlugit suliniutit annertusarneri

Isumaqatigiissutip misissornerani anguniarneqartut ima timitalerniarneqarput.

Meeqqat, innusuttut ilaqutariillu: Ukkatarineqartussat annertupput, taamaattumik Naalakkersuisoqarfik aggulunneqarpoq. Naalakkersuisoqarfiup meeqqat, inuusuttut ilaqutariillu pillugit ilisimasaat suliakkiissutigineqassapput, tassani Meeqqat Illersuisuat suleqatigineqassaaq. Inuusuttut amerlanerusut sulilissapput imaluunniit ilinniagaqalissapput, tassani siusissumik iliuuseqarnermi anguneqassapput. Naalakkersuisoqarfiup kommunit qanimut tassani suleqatigissavai. "Ilaqutariittut inuuneqarnerput nunatsinni toqqammaviuvoq, ataatsimullu ilaqutariit isigalugit siusissumik iliuuseqarnerit ingerlanneqarnissaat naalakkersuisooqatigiit sulissutigissavaat"

Peqqinnissaqarfik: Peqqinnissaq pillugu Ataatsimiititaliarsuup innersuussassai utaqqineqaqqaassapput. Susassaqarfiusumili ukiuni aggersumi aaqqiissutissanut aningaasaliisoqarnissaa Naalakkersuisooqatigiilersut isumaqatigiissutigaat. Tarnimikkut napparsimasut kræfteqartullu sullinneqarnerat pitsaanerulernissaat anguniarneqarpoq. Najugarisaq qimannagu ernisoqartalernissaa aamma anguniarneqarpoq.

Isumaginninneq: Sulisut amerlineqarnissaat anguniarneqarpoq, tassani perorsaasut, inunnik isumaginninnermik suliaqartut kiisalu inunnik isumaginninnermik ikiortit amerlisarneqarnissaat isumaqatigiissutigineqarpoq.

Aalisarneq piniarnerlu: Aalisarnerup tungaatigut allannguisoqarnissaa isumaqatigiissutaavoq. Nungusaataanngitsumik aalisartoqassaaq, tassani "siunissami aalisarsinnaaneq" qulakkeerneqassalluni. Royal Greenland namminersortunngorsarneqassanngilaq. EU nunatsinni aalisagartassanik tunineqartarunnaassaaq. Aalisarnikkut ilisimatusarnikkut ilisimasanik nunatta katersuiveqarnissaa siunnerfigineqarpoq. Aalisarnikkut pisassiinermi kulturitta ataannarnissaanik qulakkeerinnittussanik piffinni piniarnikkut inuussutissarsiuteqarfiusuni suliarineqassaaq.

Inuussutissarsiorneq: Inuussutissarsiutinik siuarsaanissaq siunertaralugu eqqarsaqatigiittarfimmik naalakkersuinikkut suliassanut innersuussisartussanik pilersitsisoqarnissaa siunnerfigineqarpoq. Inuussutissanut oqartussaqarfiup angerlanneqarnissaa qinigaaffimmi matumani sulissutiginissaa siunnertaavoq. Imminut pilersornermut tunisassiat angallannikkut tapertinneqarnissaat sulissutigineqassaaq.

Aatsitassarsiorneq: Nunatsinni uranitalinnik piiaasoqannginnissaa naqissuserneqarpoq. Qinigaaffimmi matumani aatsitassanut qinngornilinnut aatsitassarsiortoqannginnissaanik inatsisip atuutilernissaa suliarineqassaaq.

Nukissiutit: Qasigiannguit eqqaanni erngup nukinganik innaallagissiornissaq kiisalu Nuup eqqaani innaallagissiorfiup allineqarnissaaq.

Piorsarsimassuseq: Kulturi pillugu aningaasaateqarfiliortoqassaaq. Piorsarsimassuseq aallaavigalugu suliaqartut suleqatigalugit meeqqat atuarfiani ilinniartitsisoqartalissaaq.

Kommunit: Sanaartugassanut inuussutissarsiutinullu aningaasaliissutit kommuninut nuunneqarnissaat siunnerfigalugu sulianik aallartitsisoqassaaq.

Nunaqarfiit isorliunerusullu: Inuussutissarsiorneq annertusarneqassaaq - taanna siunnerfigalugu ataatsimeersuartitsisoqassaaq.

Aningaasaqarneq: Aningaasanut inatsisilioriaaseq nalilersorneqassaaq. "Allaffissornermit inunnut toqqaannarnerusumik aningaasaatitta atorneqarnissaat anguniarneqassalluni". Nunatsinni siuariartorneq inuussutissarsiutinillu siuarsaanerillu periarfissaalluarpata Nunatta Karsia amigartooruteqarsinnaasariaqartoq isumaqatigiissutigaat. Mittarfiliortiternerit ammasumik ingerlanneqassapput, innuttaasut ersarissumik nassuiaanneqassapput. "Taakununnga aningaasartuutaajumaartussat pillugit Inatsisartut nutaat suleqatigineqassapput". Coronap ilutigisaanik nunap ammaqqikkiartuaarnissaa pilersaarusiorneqassaaq. Akiliisitsiniartarnerup Namminersorlutik Oqartussanut suliaq tunniunneqarsimasoq kommuninut utertinneqassaaq. Akitsuutillit siunnersorneqarsinnaanerat annerusoq aamma suliarineqassaaq.

Innarluutillit: Inuit innarluutillit illersuisuata sulinermini aningaasatigut sinaakkutigisaa naapertuunnerusunngortinneqarnissaat isumaqatigiissutigineqarpoq. Innarluutillit pillugit inatsit nalilersoqqinneqassaaq.

Utoqqaat: Utoqqaat pillugit aaqqissuusseqqittoqassaaq. Aappaqarneq inuuniarnermi aporfilersuutaassanngilaq. Siusinaarluni suliunnaarnersiuteqartunut aaqqiinissaq iliuuseqarfigineqassasoq isumaqatigiissutaavoq. Akileraartarnerup aaqqissuuteqqinnerani utoqqaat atugaat pitsanngornissaat suliarineqassaaq.