Angusarissaartoq: Talermittartoq Europami pissartanngorniunnerni sølvinnappoq
Mikkel Andersen talerminnermi Europami pissartanngorniunnerni sølvinnappoq.
![Mikkel Andersen talerminnermi Europami pissartanngorniunnerni kusanavissumik sølvinnappoq. Privat PrivatMikkel Andersen talerminnermi Europami pissartanngorniunnerni kusanavissumik sølvinnappoq. Privat PrivatMikkel Andersen talerminnermi Europami pissartanngorniunnerni kusanavissumik sølvinnappoq. Privat Privat](https://image.sermitsiaq.ag/374527.webp?imageId=374527&width=960&height=538&format=jpg)
Mikkel Andersen talerminnermi Europami pissartanngorniunnerni, Finlandimi Laukaami sapaatip-akunnerani matumani tallimanngornermi arfininngornermilu ingerlanneqartuni, angusarissaarpoq.
Pissartanngorniunnerni ujamminnaniunnermut akuusinnaanissani neriuutigigini nalunaarutigereersimavaa, anguniagaalu iluatsilluarpoq, 70 kiilunik oqimaassusilinni saamimmik talerminnermi sølvinnakkami.
- Ujaminnannera naammagisimaartorujussuuara. Tamanna pilersaarutigisimavara, maannalu naammaginartumik angusaqarsimallunga angerlarsinnaanngorpunga.
Erfalasutsinnik nittarsaassineq misigisarujussuusoq
- Uannut misigisarujussuuvoq, aamma ujaminnattunut qaqiffiliamut qaqisinnaanera nunattalu erfalasuanik nittarsaassisinnaanera nuannaarutigisorujussuuakka, Mikkel Andersen oqarpoq.
Nunatta erfalasuata ataani sassarnissamut periarfissaqannginnini pissutigalugu Danmark sinnerlugu sassarpoq. Talermittartulli Erfalasorput nassarsinnaagini isumaqatigiissutigisimavaa:
- Tamanna uannut isumalerujussuuvoq, oqarpoq.
Ilulissani unammiuaarnermik aaqqissuussiniartoq
Mikkel Andersen oqaluttuarpoq, anguniakkani angisooq tulleq allaanerulaartoq. Tamatumanimi Ilulissani talerminnermik unammiuaarnermik aaqqissuussinissaq pineqarpoq.
Unammiuaarneq Avannaata Kommunia suleqatigalugu juulip 20-ani ingerlanneqartusatut aaqqissuunneqassaaq:
- Neriuppunga unammiuaarneq nunatsinni talermittartut amerlanerulernissaannik pilersitseqataasinnaasoq, Mikkel Andersen oqarpoq.
Elite Sports Greenland, Qarsoq Tegnestue, Pilemand aamma Sannassisoq ApS Mikkel Andersenip EM-imut peqataanissaanut aningaasaleeqataasimapput.
![Mikkel Andersen med sin sølvmedalje.](https://image.sermitsiaq.ag/374828.webp?imageId=374828&width=960&height=722&format=jpg)