Angut 27-nik ukiulik toqutsisimasutut pasineqartoq tigusarineqarpoq

Angut 27-nik ukiulik ataasinngornermi februaarip 19-ianni eqqartuussivimmi sassartinneqartussanngorpoq, toqutsisimasutut unnerluutigineqassalluni.

Angut arnamik 65-inik ukiulimmik toqutsisimasutut pasineqarpoq. Arnaq toqungasoq, Nanortalimmi silami sapaatiummat ullaap tungaani nassaarineqarsimavoq.

Kalaallit Nunaanni Politiit tusagassiorfinnut taama nalunaaruteqarput.

Arnap toqungasup nassaarineqarneranit pissutsit pissutigalugit politiit pinerluttoqarsimasinnaanera paasiniaaffigaat. MIsissuinerlu tunngavigalugu angut tigusarineqarpoq maannalu tigummigallarneqarluni.

Politiit nalunaarput angut 27-nik ukiulik eqqartuussivimmi sassartinneqarluni ataasinngornermi matoqqasumik killisiorneqassasoq.

- Eqqartuussivimmi sassartitsineq matoqqasutut ingerlanneqarnissaanik kissaatigineqartussaammat tammaammat Kalaallit Nunaanni Politiit maannakkuugallartoq allanik paasissutissanik saqqummiussisinnaanngillat, politiit allapput.

Takunnissimasinnaasut saaffiginneqquneqarput

Pisumut tunngatillugu annertuumik pinerluttoqarsimatillugu missioqqissaartartut National Kriminalteknisk Center-miit aammalu nakorsaq toqusimasut timaanik missuisarsartoq tikisinneqassapput Danmark-miit. Missueqqissaarneq annertooq suli ingerlanneqarpoq.

Takunnissimasinnaasut aamma politiinut saaffiginneqquneqarput. Innuttaasut suliamut tunngasunik soqutiginarsinnaasunik ilisimasaqarsinnaasut politiinut saaffiginneqquneqarput oqarasuaammut 701448.

- Kommune Kujallermi najukkami siunnersuisoqatigiit aammalu Kalaallit Nunaata politivi suleqatigiillutik, pisariaqartitsineq aallavigalugu toqqissisimanissaq siunertaralugu suliuniuuteqarput. Pisariqartitsigaanni tapersersorneqarnissamik Nanortalimmi Ilaqutariinnut sullissivimmut orniguttoqarsinnaavoq, politiit allapput.