Angut illup iluani aallaasersortoq iperagaasoq
Alluitsup Paani aallaasersortoqarnerata kingorna angut iperagaavoq. Tamanna innuttaasunit toqqissisimanarineqanngilaq
- Aap, aallaariartoqarpoq inuilli inuunerat ulorianartorsiortinneqanngilaq. Angut angerlarsimaffimmini aallaariarpoq inunnillu ajoqqusertoqanngilaq. Angut telefonikkut oqaloqatigaarput tamatuma kingorna aallaasini silamut igippaa politiinullu tunniutiinnarluni.
Taamak marlunngornermi KNR-imut oqaluttuarpoq Kujataani politiit pisortaat Bent Ole Kleist,
KNR paasissutissaatai naapertorlugit taamak pisoqarpoq tallimanngornermi angut imigassartorsimasoq angerlarsimaffimmini aallaasersormat. Knr.gl allappoq atiminik saqqummiusserusunngitsumit ilisimatinneqarlutik, innuttaasut toqqissisimanngissutigigaat, nal. 17-18-illu akornanni aallaasersornerup kingorna angut unnukkut iperagaammat.
- Suliaq ingerlavoq nalunaarusiortoqareerpoq, tassani piumasaarput angut akiligassinneqassasoq, Bent Ole Kleist KNR-imut oqarpoq.