Angut inuusuttoq højskolemi innarliisutut eqqartuunneqartoq

Aarhusip eqqartuussiviani eqqartuusseqataasoqartillugu eqqartuussisut marlunngormat angut 18-inik ukiulil pinngitsaaliilluni atoqateqariarsimasutut aamma niviarsiaqqanut marlunnut inuusuttut højskoleaniittunut sakkortuumik nakuusersimasutut inissinneqartussanngorlugu eqqartuunneqarpoq.

Siorna septembarimi unnuakkut innarliinerit pimmata, taakku tamarmik pingasuullutik atuarfimmi atuartuupput. Østjyllands Politiini eqqartuussisussatitaasoq, Birgitte Ernst, taama ilisimatitsivoq.

Taanna 18-inik ukiulik niviarsiaqqat marluk atuarfimmi inaannut isersimasutut eqqartuunneqarpoq. Tassani atisaajarsinnarluni niviarsiaqqat siniffimmi sinittut nallarfigai.

Taakku aappaata qaavanut qaqilluni aalajangerpaa, pinngitsaalillugulu atoqatiginiarlugu qimissinnarlugu kiivaa. Kisianni niviarsiaraq akiuummat qimaallunilu tamanna iluatsinngilaa.

Tamatuma kingorna niviarsiaqqap aappaa saassuppaa. Tassunga tunngatillugu pinngitsaaleeriartutut eqqartuunneqanngilaq, kisianni sakkortuumik nakuusertutut eqqartuunneqarpoq, niviarsiaraq qungasiatigut toqqusassigamiuk assaatigullu kiillugu, taamaalereersoq taanna aniguivoq.

Inuusuttut højskolianni innarliinerit pinerisa nalaanni, eqqartuunneqartoq taanna 17-inik ukioqarpoq. Taanna aamma 2014-inimi inuunermik sioorasaarinnissimasutut eqqartuunneqarpoq, aammalu 2013-imi tillinniarsimasutut. Pisut taakku Nunatsinni Upernavimmi pipput.

Unnerluussisup angut inuusuttoq tarnimikkut annertuumik innarluutillit inissiisarfiannut inissinneqartussanngorlugu pineqaatissinneqarnissaa piumasaraa, eqqartuussisuullu sivisunerpaaffissartaqanngitsumik inissinneqartussanngorlugu eqqartuuppaat.

- Pineqaatissiissut sakkortuvoq, taamaatummilu suliaq eqqartuusseqataasoqartillugu eqqartuussineq ingerlanneqarpoq, Birgitte Ernst oqarpoq. Pineqaatissiissut naammagisimaarpaa, naak pisunut marlunnut pinngitsaaleeriartutut eqqartuunneqarnissaa piumasarisimagaluarlugu.

Inissinneqarnissamut pineqaatissiinerup kinguneraa, eqqartuussisup inissiisarfimmit angutip anisinnaanissaata aalajangernissaata tungaanut inissinneqarnissaa.

Angut inuusuttoq eqqarsarfissaqarumavoq, landsrettimullu suliaq ingerlateqqissanerlugu isumaliutiginnippoq.

/ritzau/