Angut kollegiami pinngitsaaliisimasutut eqqartuunneqartoq
Angut tulleriisiinnarlugit marloriarluni pinngitsaaliilluni atoqateqareernerup kingorna ukiumi ataatsimi qaammatinilu arfinilinni pineqaatissinneqarsimasunut inissiisarfimmiittussanngortinneqarpoq.
Sapaatip-akunnerani qaangiuttumi Sermersuup Eqqartuussiviani angut 30-nik ukiulik marloriarluni pinngitsaaliilluni atoqateqarsimanerminut unnerluutigineqarpoq.
Unnerluussut naapertorlugu Nuummi septembarip 30-ani 2023-mi ullaap tungaani kollegiami pinngitsaaliinerit tulleriiginnarlutik pisimapput.
Unnerluussutip ilaat naapertorlugu unnerluunneqartup arnaq sinittoq atisaajarsimavaa kinguaassiuutitigullu atoqatigalugu, aatsaallu itermat arnarlu taamaalioqqusiunnaarmat atoqatigiinneq unitsinneqarpoq.
Taassuma kingorna arnaq alla assingusumik atornerluppaa.
Eqqartuussineq naammagisimaaraa
Unnerluutigineqartoq arnanik marlunnik pinngitsaaliisimasutut ukiumi ataatsimi qaammatinilu arfinilinni pineqaatissinneqarsimasunut inissiisarfimmiittussanngorlugu eqqartuunneqartoq, suliami unnerluussisussaatitaasoq Brian Viholt, Kalaallit Nunaanni Politiini inatsisilerinermut siunnersorti, Sermitsiaq.AG-mut oqarpoq.
- Unnerluussisup unnerluussisussaatitaasutullu oqartussaasut eqqartuussut naammagisimaarpaat, tamanna pivoq pinngitsaaliilluni atoqateqarnermut tunngatillugu akuersinermik tunngaveqartumik inatsisip nutaap, Kalaallit Nunaanni 2023-mi juulip aallaqqaataani atuutilersup, atuutilernerata kingorna, Brian Viholt allakkatigut akissuteqarluni oqarpoq nangillunilu:
- Arnat taakku marluk sinnerlugit tusaaneqartutut misigisimasut neriuutigaara, suliallu matuma naammassineqarnera pisimasup ajunngitsumik suliarisinnaaneranut iluaqutigiumaaraat neriuutigalugu.
Unnerluutigineqartoq eqqartuunneqareerpoq.