Angut politiinit annanneqartoq aalakoorlunilu umiatsiarsimasutut unnerluutigineqartoq
Angut 50-inik ukiulik Maniitsumut tikinnermini imaanut nakkarsimasoq politiinit uummarsarneqartariaqarsimavoq. Angut imigassartorsimalluni umiatsiaaqqamik ingerlatsisimasutut maanna unnerluunneqarpoq.
Maniitsumi politiit sisamanngornermi 16. december nalunaaqutaq 14.30 nalunaarfigineqarput angut 50-inik ukiulik Kangaamiuniit Maniitsumut imigassartorsimatilluni umiatsiaaqqamik angalalersoq. Inooqataa ilaasuusoq aamma imigassartorsimavoq.
Kangaamiuni kommunefogedi talittarfiliartinneqarsimavoq, angulli avalareersimammat unitsissinnaasimanngilaa.
Imigassartorsimallutik umiatsiaaqqamik angalasut Maniitsumut nalunaaqutaq 17.00 missaani tikimmata politiit utaqqilereersimapput. Angut 50-inik ukiulik taamaasilluni annanneqarpoq.
Kalaallit Nunaata Politiivi tusagassiorfinnut taama nalunaaruteqarput.
- Politiit umiatsiaq takugamikku aquttumut kalerriipput taliffissamut Aalisartut Aqq.taannut taleqqusillutik. Politiit takusinnaavaat angutip umiatsiani talikkaa, puttasunullu niulluni. Politiit biilinit niugamik angut umiatsiamiissimasoq periarfeeruppaat. Ammukaramik aapparisaa aperigaluarpaat, taassumalli angalaqatini aamma tammaavaa. Qaammartartumik seqersittaarinerminni paasivaat angut imaanut nakkarsimasoq, anersaartunngitsorlu, politiit allapput.
Uummarsarneqartoq unnerluutigineqarlunilu
Politiit angut imaanit qaqikkasuarpaat uummarsalerlugulu. Angut anersaartoqqilermat politiit peqqinnissaqarfimmut kalerriigasuarput. Angut peqqinnissaqarfimmi passunneqarsimavoq, tassanilu imigassartorsimaneranut tunngatillugu misissugassamik aamma aaversinneqarluni.
- Aavani promille qanoq annertutiginersoq suli paasinngikkaluarlugu, uppernarsaateqarluarpoq angut 50-inik ukiulik imigassartorsimatilluni umiatsiamik angallassisimasutut. Angutip pisut ilumoorneri aamma nassuerutigai, politiit ilisimatitsipput.
- Suliami uani qularnanngilluinnarpoq angut aalakoorpallaarnermini imaanut nakkarsimasoq. Ima aalakoortigalutit, allaat pisuffissatit takusinnaanagit imaanut nakkarsinnaaguit, taava umiatsiaaqqamik aqunnerni imminuinnaanngitsoq, aammali imaani angalasunut allanut ilaasornullu inuunermik ulorianartorsiortitsivutit, vicepolitiinspektør Johan Westen oqarpoq.
Taassuma Maniitsumi suleqatini iliuuseqapallassimanerat pillugit nersualaarpai.