Angut sakkortuumik pinngitsaaliilluni arneriffiginninniarsimanini nakuusersimaninilu pillugit tigummigallarneqarnissamut eqqartuunneqarpoq

Angut 34-nik ukiulik Maniitsumeersoq ippassaq Qeqqata Eqqartuussiviani piffissaligaanngitsumik tigummigallarneqarnissaminut ippassaq pingasunngornermi eqqartuunneqarpoq, sakkortuumik pinngitsaaliilluni arneriffiginninniarsimanini arfineq-marloriarlunilu nakuusersimanini pillugit. Taamatut Kalaallit Nunaanni Politiit tusagassiuutinut nalunaaruteqarput.

34-nik ukiulik arlaleriarluni nakuusersimasutut unnerluutigineqarpoq, suliamili pingaarnertut pineqartoq tassaavoq Maniitsumi Esbjergip Aqqutaani 2023-mi apriilip 14-ianni unnuakkut sakkortuumik pinngitsaaliilluni arneriffiginninniarsarisimanera. Arnamik taamanikkut 25-nik ukiulimmik pinngitsaalillugu arneriffiginninniaraluarsimanerminut angut pisuutinneqarpoq, sakkortuumik nakuusernertalimmik, toqqusassiinermik, timaatigut niaquagullu tilluillunilu tukertaanertalimmik. Arnaq atisaqarpiarani inissiamit qimaasinnaasimavoq, politiit nalunaarput.

Angut piffissaligaanngitsumik tigummigallarneqarnissaanik eqqartuussiviup aalajangernera unnerluussisup Alexander Stürupip naammagisimaarpaa.

- Tigummigallaaneq tassaavoq pinerluttulerinermi inatsisit naapertorlugit pillaatisiassat qaffasinnerpaartaat. Eqqartuussut piffissaligaanngilaq, aatsaallu eqqartuussiviup tarnip pissusaanik ilisimasallip nalunaarusiaa tunngavigalugu inunnut allanut ulorianartuujunnaartoq naliliippat iperagaasinnaavoq, Alexander Stürup oqarpoq.

Nunatta Eqqartuussivianut suliassanngortitsineq

Angutip eqqartuussut Nunatta Eqqartuussivianut ingerlaannaq suliareqqitassanngortippaa. Nunap eqqartuussiviani suliap aalajangiiffigineqarnissaata tungaanut angut politiinit tigummigallarneqartussaasoq ilisimatitsissutaavoq.

Eqqartuussiviup eqqartuussinermi nakorsat siunnersuisoqatigiivisa suliamut tunngatillugu innersuussutaat malinniarpaa, taamatullu aalajangiinerit sakkortuumik pinerlunnernik tunngaveqartut unnerluussisup erseqqissarpaa.

- Suliami matumani unnerluutigineqartup tigummigallarneqarnissaanut aalajangiinissamut unnerluutigisap siornatigut pinerlussimanera aalajangiisuulluinnarpoq. 2009-miilli inunnut navianartorsiortitsisunik pinerlussimanini pissutigalugu arfineq-marloriarluni eqqartuunneqarpoq, katillugit ukiuni arfineq-pingasungajanni pineqaatissinneqarsimasunut inissiisarfimmiinnikuulluni. Taamaattumik unnerluutigineqartoq pitsanngoriartinnagu Maniitsumi aqqusinermi takuneqaqqinnginnissaa politiit unnerluussisullu naammagisimaarluinnarpaat, Alexander Stürup itisiliivoq.