Angut tigummineqararlarpoq arfinilinnik ukiulik persuttaramiuk
Angut 48-nik ukiulik Nuummeersoq tigummineqarallarpoq nukappiaqqamik arfinilinnik ukiulimmik persuttaagami, nukappiaraq arpalluni maleriarlugu orlummat kiinaatigut isummippaa
Tamanna Nuup qeqqani pivoq ataasinngormat unnukkut arfineq pingasut qaangilaaraa.
Angut 48-nik ukiulik marlunngormat nalunaaqutaq ataatsimut Nuup eqqartuussiviani inatsisit malillugit killisiorneqarluni sassartinneqarpoq, unnuulli siuliani pisimasoq pillugu eqqaamasaqanngilaq aalakoorsimanini pissutigalugu.
- Pisimasumut tunngatillugu eqqaamasaqanngilanga, kisianni isumaqarpunga immaqa isumaqarsimallunga taakku tassaasimasut ippassaanik meeqqat pingasut hashimik pisiffigisimasakka taamaattumillu arpallunga malilersimagikka. Meeqqanit pisiarisara karamelimik imaqarunarpoq hashiunani, 48-nik ukiulik eqqartuussivimmi oqarpoq.
Angut 48-nik ukiulik ulluni 14-ini tigummineqarallartussanngortitaavoq suliaq 2009-mi inooqatigisaminik persuttaasimeranik suli ingerlammat kiisalu nukappiaqqamik arfinilinnik ukiulimmik saassussisimanermigut, annertuumik inatsisinik unioqqutitsisimasutut. Aalajangiinerli Nunatta Eqqartuussivianut ingerlateqqippaa.
Saassussineq pillugu allaaserisaq aamma nukappiaqqap arfinilinnik ukiullip, angummit aalakoortumit saassuneqartup arnaata apersorneqarnera tamakkerlugu AG-imi atuaruk.