Angut toqungasoq nassaarineqarsimasoq
Angut Nuummi akunnittarfiup inaani toqungasoq ataasinngormat nassaarineqarsimavoq. Politiit toqungasup timaanik misissuisimanerisa takutippaa, angutip toqunera pinerluttoqarsimaneranik pissuteqanngitsoq.
Politiit ataasinngornermi Nuummi Hotel Hans Egedep initaasa ilaani angut toqungasoq nassaarineqarmat aggersarneqarsimapput.
Pigaartut pisortaata Hans Peter Berthelsenip ilisimatitsissutigaa, toqusoqarsimaneranut atatillugu politiit misissuinertik naammasisimagaat.
Misissuinermi paasineqarsimavoq, angutip toqunera pinerluuteqartoqarsinarani pissuteqanngitsoq, pigaartut pisortaat oqarpoq.
Politiit pisumut atatillugu pinerluuteqartoqarsimanersoq misissorsimavaat kiisalu toqungasup timaanik misissuisimallutik.
Toqusimasoq tassaavoq pattattartoq Ion Faghiur. Hans Egedep Hotelianit toqusoqarsimanera marlunngornermi Facebookikkut saqqummiunneqarpoq:
- Ion pattattartutut Nuummi nuannarineqalipallallunilu ataqqineqalipallassimavoq, ukiullu 17-it sinnerlugit Hotel Hans Egedemi sulisimalluni.
- Ionip ilaqutai qanigisaalu ajunnginnerpaamik kissaallugillu misiginneqatigaavut, akunnittarfik facebookikkut allappoq, taanna akunnittarfiup facebookiatigut takuneqarsinnaavoq.