Angutit nakuusersimasut marluk eqqartuunneqartut
Aasianni eqqartuussivimi angutit marluk qaammatini tallimani isertitsivimmiittussatut eqqartuunneqarput.
Arlaleriarlutik nakuusersimanertik peqqutigalugu angutit marluk eqqartuunneqartut decembarip 19-ianili tigummigallarneqarsimapput. Aappaa Kangaatsiameersuuvoq aappaalu Aasianneerluni.
- Angut Kangaatsiameersoq arnamut nakuusersimanini pillugu tigusarineqarpoq, aammali nakuusersimanernut allanut sulianullu allanut ingerlasunut tamanna aamma tunngavoq. Taamaattumik aalajangerparput tigusariniarlugu decembarillu 29-ata tungaanut tigummigallarneqarpoq. Januaarip 11-ani ataasinngornermi eqqartuussivimmut sassartinneqarpoq, qaammatinilu tallimani isertitsivimmiittussatut eqqartuunneqarluni, Aasianni politeeqarfimmi pisortaq Aqqaluk Petersen oqarpoq.
Angutip aappaa decembarip 19-ianiilli aamma tigummigallarneqartoq arfininngornermi decembarip 19-iata unnukkuani angutinut pingasunut nakuunersimanini pillugu tigusarineqarpoq, januaarillu 12-anut tigummigallarneqarluni.
- Angut januaarip 12-ani eqqartuussivimmut sassartinneqartoq aamma qaammatini tallimani isertitsivimmiittussatut eqqartuunneqarpoq angutinut pingasunut nakuusersimanini pillugu. Pisiffiup silataani angutit marluk ilisimajunnaarsippai, imerniartarfiullu silataani angutit pingajuannut aamma nakuuserluni, Aqqaluk Petersen oqarpoq.