Aningaasaateqarfik kalaallinut arfineq-marlunnut angusaqarluarniartunut aningaasaliivoq
Hollandimi, Tuluit Nunaanni Australiamilu ilinniarniartunut arfineq-marlunnut Aningaasaateqarfik Ivalo & Minik 300.000 koruunit sinnilaarlugit agguaassivoq.
Kalaallinut ilinniartunut nunani allani ilinniarniartunut aningaasaateqarfik Ivalo & Minik aningaasanik agguaaqqippoq.
Qinnuteqartut piukkunnarluinnartut amerlanerujartuinnartut, tamannalu nuannaarutaalluartoq, aningaasaateqarfiup siulersuisuisa siulittaasuat, ilisimatooq Minik Rosing, tusagassiuutinut nalunaarummi oqarpoq:
- Kalaallit Nunaanni Danmarkimilu nalunngilluinnagartik toqqissisimaffitsillu qimallugit ilinniagarerusutartik pilerigilluinnagartik pillugu taama amerlatigisut pikkorissarusulernerat nuannerpoq, Minik Rosing oqarpoq nangillunilu:
- Hollandimi, Tuluit Nunaanni aamma Australiami kalaallinut ilinniagaqarusuttunut aningaasanik tamatumuuna agguaassivugut. Tamarmik annertuumik ilikkagaqassasut, Kalaallit Nunaannullu uterlutik piginnaasatik atussagaat neriuutigaarput.
Aningaasaateqarfik allappoq, Royal Greenlandip, Royal Arctic Linep, NunaFondenip aammalu GrønlandsBANKEN-ip Inuussutissarsiornermi aningaasaateqarfiup aningaasaliineratigut kalaallinut nunanut allanut ilinniariarusuttunut aningaasaateqarfik aningaasaleeqqissinnaasimasoq.
Ukiaanerani aningaasaliiffigineqartut:
Victor Langholz Tuluit Nunaanni Londonimi, International Business HULT International Business School-imi Science Masterinngorniarnissaminut aningaasaliiffigineqarpoq.
Sigrid Christiansen Sverige-mi, Leksand Folkhögskola-mi atuakkanik ungalulersuisutut ilinniaqqinnissaminut aningaasaliiffigineqarpoq.
Najârak Demant-Poort Ilisimatusarfimmi Phd-nngorniarnerminut atatillugu suliaqarnerminut Oslo-mi, Institutt for Samfunnsforskningimi ukiup affaa ilisimatusarnissaminut aningaasaliiffigineqarpoq.
Najannguaq Berthelsen Islandimi gletsjerguide-itut ilinniaqqinnissaminut aningaasaliiffigineqarpoq.
Edna Lyberth DTU-mi fiskeriteknolog-itut ilinniarnerminut atatillugu Perth-imi, University of Western Australiami, semesteri ataaseq ilinniariarnissaminut aningaasaliiffigineqarpoq.
Annika Christiansen Københavns Professionshøjskolemi Natural Cultural heritage ilinniarnerminut atatillugu Australiami, University of the Sunshine Coastimi, semesteri ataaseq ilinniariarnissaminut aningaasaliiffigineqarpoq.
Amaasa Olsen Hollandimi, University of Amsterdamimi, Sociologimi Masteritut ilinniarnissaminut aningaasaliiffigineqarpoq.
Aningaasaateqarfiup Ivalo & Minip siulersuisui ukiumut marloriarlutik aningaasanik agguaassinissaq pillugu ataatsimiittarput, siulersuisullu tulliani agguaassinissaminnut amerlasuunik pitsaasunillu qinnuteqaatinik tigusissallutik Minik Rosing neriuppoq, qinnuteqarnissamut killigititaq 15. februar 2024.