Aningaasanik aqutsisinnaaneq meeqqat atuarfiini ilinniartitsissutigineqartalerli
Siumut sinnerlugu inatsisartuni ilaasortap, Malik Berthelsenip Naalakkersuisunut eqqarsaatigeqquaa meeqqat atuarfianni atuartunut angajullernut aningaasanik aqutsisinnaaneq ilinniartitsissutigineqarsinnaanersoq, ilaqutariippassuit aningaasaatitik aqussinnaanngimmassuk.
Meeqqat atuarfianni atuartunut angajullernut aningaasanik aqutsisinnaaneq erniortitsisinnaanerlu ilinniartitsissutigineqarsinnaanissaa Naalakkersuisut eqqarsaatigisinnaanerlugu? Inatsisartuni Ilaasortaq, Malik Berthelsen, Siumut, paragraf 36-imi naalakkersuisunut apeqquteqarpoq.
Apeqquteqarnerminut tunngavilersuutigaa, isumaqarami ilaqutariippasssuit inuunerlunnerannut atugarliornerannullu pissutaasut annerpaat ilagimmassuk aningaasanik aqqutsisinnaannginneq.
- Nunami inukitsunnguami inuuvugut. Taamaattumik aningaasanik annertuumik atornerluineq aningaasarsiffinni, utoqqalinersiffinni, augustip naanerani akileraarutinik utertoorfinni kiisalu kilisaatit tikiffiini imaluunniit aningaasarsisimaffiini ersarissorujussuarmik takuneqarsinnaajuaannarpoq, apeqquteqaatimini tunngavilersuivoq.
Malik Berthelsen isumaqarpoq aningaasanik aqutsisinnaannginnerup kingunerisaraa aningaasarsinerup kingorna ullut 1-2-it qaangiunneranni aningaasaataarutereerneq, tassa inuunermi pisariaqarnerusunut akissaarutereerneq.
Taanna isumaqarpoq tamassuma ajornartorsiutip aaqqinnissaannut inersimasut taamatut inuuneqalereersimasut aaqqinnissaat ajornartorujusussuussasoq.
- Kinguariit tullii atugarissaarnerusut pilersinniarutsigit meeqqat atuarfiat aallaaviusariaqartoq isumaqarpunga. Inersimasunngortigatik ilikkareertariaqarpaat aningaasanik aqutsilluarsinnaanerup aqutsisinnaannginnerullu suut kingunerisinnaaneraat, ;alik Berthelsen isumaqarpoq.
Assersuutigaa kilisaatini avataasiortut aningaasanik aqutsisinnaasut nalilinnik arlaannik pigisaqarmata, aqutsisinnaanngitsortaali ilaminnut sanilliullutik suuteqaratik, naak agguaqatigiissillugit ukiumut 600.000kr.-it angullugit aningaasarsiaqaraluarlutik.