Aningaasanut inatsisissaq oqimaaqqatigiippoq - ngajappoq
Marlunngorpat Siumut aamma Atassut aningaasanut inatsisissamut akuerseqataanavianngillat
Ukiaanerani ataatsimiinneq naggataarlugu marlunngornermi Inatsisartuni amerlanerussutillit tassaasut Inuit Ataqatigiit, Demokraatit aamma Kattusseqatigiit Partiiat, 2012-imut aningaasanut inatsimmut akuersaarlutik taasissapput, ikinnerussuteqartut Siumut aamma Atassut akerliullutik taasissamaartut.
Aappaagumut aningaasanut inatsisissaq 232,3 million koruuninik amigartuussaaq, kisianni nunatta karsiata namminersorlutik oqartussat ingerlataannut atukkiussai - Kalallit Nunaanni nukissiornermik pilersuinermik suliallup Nukissiorfiit erngup nukinganik innaallagissiorfiliorneranut attartugaa ilanngaatigigunik - ingerlatsinermut sanaartornernullu aqutsiviit 100.000 koruuninik sinneqartuussaaq. Aningaasaqarnermut naalakkersuisoq Maliina Abelsen, Inuit Ataqatigiit taamaalilluni aningaasaqarnermut inatsisip qulequtaanik "Allanngortitsinerit oqimaaqqatigiissut" naammassinneqalaassaaq.
Taamaakkaluartoq Maliina Abelsenip oqimaatsorsiornera tamaanga killeqanngilaq. Ukiuni missingersorfiusuni 2013, 2014 aamma 2015, nunatta karsia amigartuussaaq - ingerlatsinermut sanaartukkanullu aningaasartuutit ilanngukkaluarunilluunniit - taakku aamma taaneqartartut DA'mik naatsorsuutit, imaluunniit aningaasat attartortitat DAU'mik naatsorsuutit ilanngukkaluarpataluunniit amigartoorfiussapput.
2012'imut ukiunilu missingersorfiusuni pingasuni aningaasanut inatsisip million koruuninngorlugu inernerissavaa:
……………... DAU………..…DA
2012……..÷ 232,3……….+ 0,1
2013..…...÷ 246,7…….. ÷ 92,6
2014……... ÷ 27,7 ….… ÷ 52,8
2015 ……...÷ 61,3 …... ÷112,0
Aningaasaqarnermut akileraartarnermullu ataatsimiititaq sapaatip akunnerata naanerani anorleraluaqigaa qaanngiuttoorlutik sulipput, immikkut aningaasaliissutissat pillugit isumaliutissiissummik marlunngornermi pingajussaanneerneqartussamik inerniaallutik.
– Ernumanartoqarpoq piffissarlu ungasinnerusoq isigalugu ukiuni missingersuiffiusuni DA- amigartooruteqarluni ingerlassappat, ataatsimiititaliaq naliliivoq.
Taamaattumik Aningaasaqarnermut akileraartarnermullu ataatsimiititaliap (ataatsimiititap nammineq saqqummiussaa, aaqq.) piumasaraa tulliani aningaasanut inatsimmut siunnersuummiit DA'p inernera aningaasaqarnermut inatsimmi aamma ukiuni missingersuiffiusuni oqimaaqqatigiilernissaanut naalakersuisut anguniagaqassasut. Taamaasilluni nunatta karsiata sinneqartoorluni ingerlaqqilerniassammat.
Naalakkersuisooqatigiit partiivisa pingasut marlunngorpat aningaasaqarnermut inatsit akuerineqallaquaat, illuatungiliuttulli aningaasanut inatsisissaq atorsinnaannginnerarpaat.