Aningaasanut inatsit oqimaaqatigiimmik inerneqarnissaa Demokraatit qularinngilaat
Aningaasaqarnermut naalakkersuisoq, Vittus Qujaukitsoq, Demokraatit tatigilluinnarpaat. Demokraatit Naalakkersuisunut tapertaatillugit aningaasanut inatsimmi amigartoortoqarnavianngitsoq, partiip siulittaasorigallagaata neriorsuutigaa.
Demokraatit Naalakkersuisut tatigaat, aningaasaqarnermullu naalakkersuisup, Vittus Qujaukitsup, aningaasanut inatsit oqimaaqatigiitikkumaaraa.
Demokraatini siulittaasuugallartoq, Randi Vestergaard Evaldsen allagaqarluni taama akissuteqarpoq.
- Tamanna tunuliaqutigalugu IA-meersut eqqissiveerunnerat tupigusuutigaara, Randi Vestergaard Evaldsen taama allappoq.
IA 2016-imi aningaasaqarnermut naalakkersuisuutitaqarmat, aningaasanut inatsit amigartoorujussuarsimasoq taassuma oqaatigaa.
Inuit Ataqatigiinneersup Aqqaluaq B. Egedep ippassaq Inatsisartut ataatsimiinneranni Naalakkersuisut qinnuigai, nunap aningaasaqarnera pillugu tamakkiisumik ammanissaat.
Tamatumunnga tunuliaqutaavoq, aningaasaqarnermut naalakkersuisoq, Vittus Qujaukitsoq, aningaasaqarnermut akileraartarnermullu ataatsimiititaliamut allakkamik oqaatigineqaqqusaanngitsumik nassiussisimanera, tassanilu tunngaviusumik missingersuutit 461 millionit koruuninik amigartoorfiusut ilisimatitsissutigaa.
Aningaasanut inatsit oqimaaqatigiittoq
Kisianni tamanna Demokraatit ernumassutiginngilaat. Randi Vestergaard Evaldsen ilisimatitsivoq, Vittus Qujaukitsup (NQ) partiit tamarmik nassuiaaffigisimagai, naalagaaffimmit tapiissutinit akitigut aamma akissaatitigut aaqqiissutit allallu tulleriiaarinerit naatsorsorneqarsimanngitsut.
Aningaasanullu inatsisissaq oqimaaqatigiittumik imaluunniit sinneqartoorfiussasoq oqaatigaa.
- Eqqissisimaannavippugut. Demokraatit tapertaatillugu aningaasanut inatsimmi minnerpaamik oqimaaqatigiittumik inerneqartoqartassaaq. Tamanna oqallisissaanngilaq, tamannalu qujanartumik Naalakkersuisut uagutsitupajaaq nalunngilaat, Randi Vestergaard Evaldsen oqarpoq.
Inatsisartunut ilaasortat siunnersuutit annertuumik aningaasartuuteqarfiusut maluginiassagaat, taanna oqarpoq, kisianni maanna inatsisissatut siunnersuutit Naalakkersuisunit ingerlanneqartut tamarmik unitsinneqarsimanngitsut, taassuma naqissuserpaa.