Aningaasaqarnermut ataatsimiititaliaq KIIIN pillugu misissuisitserusuppoq
Inatsisartuni aningaasaqarnermut ataatsimiititaliap piumasaaraa Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfik misissuiffigineqassasoq. Piumasaqarnerup tunulequtaraa Qasigiannguani efterskolemut aningaasaliisoqarnerani naalakkersuisoqarfiup suleriaaserisimasaa
Ataatsimiititaliap sakkortuumik uparuaalluni naalakkersuisoqarfiup pisumut tunngatillugu sulisumanera, tamatumani pineqarpoq Qasigiannguani efterskolemut immikkut ittumik aningaasaliissutit 11,5 milioni koruunit.
Suliamut atatillugu Aningaasaqarnermut Ataatsimiititaliaq 24-nik apeqquteqaateqarpoq. Akissutillu tigoreerlugit ataatsimiititaliap naalakkersuisoqarfik toqqaannartumik pisuutippaa pisoq pillugu eqqunngitsumik ilisimatitsinerarlugu.
Isorisat ilagaat naalakkersuisoqarfimmit isertuunniarneqarsimagaluarmat tusarniaanermut atatillugu aningaasaqarnermut naalakkersuisoqarfiup immikkut aningaasaliissuteqarnissamut siunnersuummut annertuumik isorinnissimanera.
Kiisalu aningaasaqarnermut atatsimiititaliamik naalakkersuisoqarfik aperineqarami sooq paasissutissat isertuunneqarsimanersut, ataatsimiititaliaq "malunnarluinnartumik isumaqanngitsumik nassuiaaniartoqaraluarpoq", pisuutitsineq taamatut oqaasertaqarpoq.
Iseqqilluinnarpoq malunnarluinnarlunilu Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfik pisumut tunngatillugu sooq taamatut iliorsimanertik nalunngilluinnarsimagaat, aningaasaqarnermut ataatsimiititaliamit isorinnermi naalakkersuisunut ilisimatitsissummi taamatut allassimavoq.
Ataatsimiititaliamit aammattaaq isornartorsiorneqarpoq suliamut tunngatillugu naalakkersuisoqarfimmi torinngitsumik sulisoqarsimanera. Kiisalu ataatsimiititaliap KIIIN-imut assuarlernini imatut tulleriiaarpaa:
- Aningaasaqarnermut Ataatsimiititaliap Qasigiannguanit immikkut aningaasaliissuteqarnissamut qinnuteqaat assut aarlerinartoeqartippaa. Kisitsisit naalakkersuisunit saqqummiunneqartut aamma naatsorsuinerit illuinnaasiorpallaarsimapput piviusumik tunngaveqanngitsut imaluunniit imminnut assortuullutik. Paasissutissat pingaaruteqartut ataatsimiititaliamut tunniunneqarsimanngillat, kiisalu naalakkersuisut akunnerminni erseqqissaanerat suliassamullu piareersarnerat uivertumik ingerlanneqarsimavoq.
- Ataatsimut oqaatigalugu pisimasoq Aningaasaqarnermut Ataatsimiititaliamit akuerineqarsinnaanngilluinnartutut kanngunartutullu isigineqarpoq. Ataatsimiititaliap sakkortuumik inassutigissavaa naalakkersuisunut ilaasortap akisussaasup aamma naalakkersuisut siulittaasuata utaqqititsinatik piaarnerpaamik iliuuseqarnissaat, taamaaliornermikkut siunissami assigisaanik akuerineqarsinnaanngitsunik pisoqaqqinnginnissaa anguniarlugu!
Naggataatigut Aningaasaqarnermut Ataatsimiititaliap piumasaraa kukkunersiuinermut ataatsimiititaliaq misissueqqissaarnermik ingerlatseqqullugu.