Aningaasaqarnermut ataatsimiititaliaq utaqqikatattoq: Naalakkersuisut qinnuteqaammik suli tunniussinngillat
Aningaasaqarnermut ataatsimiititaliaq tallimanngornermi ualilluartoq tusagassiuutitigut nalunaaruteqarluni erseqqissaavoq ajunaarnersuartut ittumik piniartut, aalisartut nunalerinermillu inuussutissarsiuteqartut ikiorserneqarnissaannut Naalakkersuisut suli qinnuteqaammik tunniussaqanngitsut.
Aalisartunut, piniartunut savaatilinnullu silap pissusianik aallaaveqartumik ajunaarnersuarmi ikiorsiissutit december 2023-miilli tunniunneqarsinnaalernissaannut toqqammavimmik qularnaarisoqarnissaanik Naalakkersuisut qinnuteqaataata akuerineqarnissaa Aningaasaqarnermut Ataatsimiititaliap ulloq 14. december aalajangerpaa.
Aningaasaqarnermut Ataatsimiititaliap aalajangiinera Naalakkersuisunut piginnaatitsissutaavoq Aningaasaqarnermut Akileraartarnermullu Ataatsimiititaliap akuersissuteqarneratigut aalisartunut, piniartunut nunalerisunullu aningaasaqarnikkut ikorfartuinissaannut, taakku inuussutissarsiornermi isertitaat 2023-mi silap pissusiata kingunerisaanik piffissap sivikitsup iluani tamakiisumik annertuumilluunniit appariarsimappata.
- Qulaani pineqartut pillugit Naalakkersuisut qinnuteqaataannik aningaasaqarmut ataatsimiititaliaq suli tigusaqanngilaq. Aalisarnermut Piniarnermullu Naalakkersuisoqarfiup ulloq 27. december 2023 tusagassiorfinnut nalunaarutaa naapertorlugu 2024-mut aningaasanut inatsimmi kontumut pingaarnermut 51.01.04-mut Aallartitseqqinnissamut tapiissuteqartarneq oqaasertaliussap innersuussutigineqarnera ataatsimiititaliap maluginiarpaa.
- Tamatumunnga atatillugu ataatsimiititaliap erseqqissassavaa aalisartunut, piniartunut savaatilinnullu silap pissusianik aallaaveqartumik sunnerneqarsimasunut ajunaarnersuarmi ikiorsiissuteqartoqarnissaata pisariaqarluinnarnera ataatsimiititaliap paasilluarsimammagu.
Ataatsimiititaliap taamaattumik pissusissamisuunngilluinnartutut isigivaa inuiaqatigiinni immikkoortut taakkua ukioq manna ikiorserneqarnissaminnik neriarsorneqarsimasut suli utaqqisinneqaqqissammata.
Utaqqisitsisoqarnera pillugu ajuusaarput
Aningaasaqarnermut ataatsimiititaliap naammagisimaanngilaa piniartut, aalisartut nunalerinermillu inuussutissarsiuteqartut, silap pissusaata allanngornerata kingunerisaanik inuussutissarsiumminnik ingerlatsinissaminnut ajornartoortutut misigisimallutik qinnuteqarsimasut utaqqisinneqarmata:
- Inuit ikiorserneqartussatut eqqarsaatigineqartut eqqarsaatigalugit suleriaatsit suut malinneqassanersut inuiaqatigiinni nalinginnaasumik nalorngissutaavoq. Aningaasaqarnermut Ataatsimiititaliap taamaattumik Naalakkersuisut qinnuigai suliami suleriaasiusimasoq suliallu killiffia pillugit nassuiaateqaqqullugit.
Ataatsimiititaliap taamatuttaaq pingaarutilerujussuartut isigivaa sooq ikiorsiissutit 2023-mi decembarimili tunniunneqarsinnaasussaasimagaluartut aatsaat 2024-mi timitalerniarneqarnerat pillugu Naalakkersuisut innuttaasunut paasissutissiissasut.
Immikkut pisoqartillugu periaatsit aalajangersimasut amigaataapput
Aningaasaqarnermut ataatsimiititaliap tungaanit matumani ujartorneqarpoq immikkut pisoqartillugu periaatsit aalajangersimasut pilersinneqarnissaat, taamaaliornikkut immikkut ittumik ikiorsiinissamik aalajangertoqarsimatillugu nalorninaatsumik sukkasuumillu ikiorsiisoqarsinnaanissaa qulakkeerniartariaqarmat:
- Ikiorserneqarnissamut periarfissat eqqarsaatigalugit nalorngissuteqarneq kikkut iliuuseqartussaanerannut aalajangiinissamullu akisussaasuunerannut aamma tunngammat, tamanna pillugu Naalakkersuisut erseqqissaateqarlutillu nalunaaruteqarnissaat ataatsimiititaliap kissaatigaa.
Taamatut erseqqissaateqarluni aningaasaqarnermut ataatsimiititaliap siulittaasua, Asii Chemnitz Narup ataatsimiititaliaq sinnerlugu naggasiivoq Naalakkersuisut qinnuteqaataata tigunissaa Aningaasaqarnermut Ataatsimiititaliap qilanaaraa.