naalagaaffeqatigiinneq
Aningaasaqarnermut ministeri ataatsimeeqatiginiarpaa
Folketingimut ilaasortap Johan Lund Olsenip, IA, qallunaat 2015-imut aningaasanut inatsisaat isornartorsiorpaa, kalaallit pisariaqartitaannik kissaataannillu naammassinninngitsutut
– Massakkut oqaaseqarusunngilanga, sulili isumaqatigiinniarpugut, Johan Lund Olsen naatsumik oqarpoq, arfininngormat ullaap tungaani Sermitsiaq.AG-p aperimmani qallunaat 2015-imut aningaasanut inatsisaat isumaqatigalugu taasissanersoq.
Johan Lund Olsenip aningaasanut ministeri Bjarne Corydon, Socialdemokraterne, ataatsimeeqatiserisimavaa, taassumalu qinersinissamut nalunaarutiginninnerup kingorna Kalaallit Nunaat pillugu attaqaqatigiinneq unitsissimavaa. Qaqugu ataatsimiinnissaq suli ullulerneqanngikaq, IA sinnerlugu folketingimut ilaasortaq oqarpoq.
Aningaasaqarnermut ministeri oqaloqatigisimavaa
Septembarimi qinersinissamik nalunaarutiginninnissaq sioqqullugu IA-p Finansministereqarfiullu akornanni 2015-imut aningaasanut inatsisissasut siunnersuut oqaloqatigiissutigineqarsimavoq.
Septembarip 19-ianni IA-p folketingimut ilaasortaataitaata qallunaat aningaasaqarnermut ministeriat Bjarne Corydon, IA-p aappaagumut Aningaasanut Inatsimmut kissaatigisaanik, aallarnisaataasumik oqaloqatigisimavaa. Ataatsimiinnermi isumaqatigiissutigineqarpoq IA-p Aningaasanut Inatsimmut kissaatigisai pillugit ataavartumik oqaloqatigiittoqassasoq, isumaqatigiissuteqartoqarnissaata tungaanut, Tamannali suli aallartinneqanngitsoq Inatsisartunut qinersinissaq nalunaarutigineqarpoq, tamannalu tunngavilersuutigalugu finansminstereqarfiup isumaqatigiissut utertippaa. Tamatuma kingorna Finansministereqarfimmut taamaallaat allakkatigut itisuliisutigut attaveqartoqartarsimavoq, IA novembarip 13-ianni tusagassiorfinnut nalunaarutikkut allappoq ulloq taanna naalakkersuisut SF-imik Enhedslistenimillu qallunaat aningaasanut inatsisissaannik isumaqatigiissuteqarnerat eqqorlugu.
– Naammaginanngilaq aningaasaqarnermut ministerip tunngavilersuutigimmagu Kalaallit Nunaanni qinersinissaq pissutigalugu Folketingimut ilaasortatut kissaatigisavut pillugit oqaloqatigiinnerup unitsinneqarneranut, Johan Lund Olsen oqarpoq.
IA aningaasaqarnermut ministerimut kissaatigisanik arlalinnik saqqummiussaqarsimavoq: Kalaallit Danmarkimi atugarliortut isumagineqarnissaat, eqqartuussiveqarneq, pinerluuteqarsimasunik isumaginniffik, illersornissamut tunngasut, inatsisitigut ataataqanngitsut aammalu kalaallinut Danmarkimiittunut inuiaqatigiinnut akulerutsitsinissamik suliniuteqarnissaq.
Siumumeersup Doris Jakobsenip aningaasaqarnermut ministeri isumaqatigiissuteqarfigisimavaa decembarimi kalaallit soqutigisaannik oqaloqatigissallugu.
– Kingorna IA neqeroorfigisimavara ataatsimiinnissami tassani peqataanissaanik, ataatsimoorluta kissaatigisavut saqqummiunniassagatsikgit, Doris Jakobsen oqarpoq.
Aningaasanut Inatsisissatut siunnersuut folketingip taasissutigissavaa decembarip 18-ianni.