Aningaasarliorneq silallu pissusaata allanngornera: Naalakkersuisut qinnuteqaataat sisamanngornermi suliarineqarasuassaaq
Ataatsimiititaliat marluk Naalakkersuisut siunersiorpaat ataasinngornermi, tamatumalu kingorna Naalakkersuisut qinnuteqaateqarput marlunngornermi. Qinnuteqaat aningaasaqarnermut ataatsimiititaliamit pinasuartumik suliarineqassaaq sisamanngornermi.
Qularutissaanngilaq minutsit, nalunaaquttap akunneri ullullu isertitakinnerusunut aammalu minnerunngitsumik nunatta avannaarsuani piniartunut ilaqutaannullu aningaasarliornermik eqqornerlugaasunut isumalerujussuusut.
Sapaatip akunnerata siuliani sisamanngornermi Savissivimmi aalisartut piniartullu siulittaasuat, Ole Kristensen Sermitsiaq.AG-mut oqaluttuarpoq, novemberip aallartinneranili piniartut isertitaarussimasut, tassungalu pissutaasoq immap sikunngitsoornera aammalu kaperlannerani umiatsiamik piniariartoqarsinnaannginnerata kingunerisaanik suminermilluunniit inuussutissarsiumminnik ingerlatsisinnaajunnaaqqallutik, taamaammallu novemberip aallartinneranili isertitassaarussimallutik.
Maannali nunatta Inatsisartuisa Naalakkersuisuisalu ikiorsiissutissamik aaqqiiniarnerat ullulerneqarsinnaarpasilerpoq.
Aningaasaqarnermut akileraartarnermullu Naalakkersuisoq, Erik Jensen (S) oqaluttuarpoq Naalakkersuisut sinnerlugit qinnuteqaammik Inatsisartut aningaasaqarnermut ataatsimiititaliaanut marlunngornermi nassiussisimalereerluni, tamannalu pisoq Inatsisartut inuussutissarsiornermut ataatsimiititaliaata aammalu aningaasaqarnermut ataatsimiititaliaata ataatsikkoorlutik aningaasaqarnermut naalakkersuisumik nalunaaquttap akunnerini arlalinni siunersiuereernerisa kingunerisaanik.
- Tamatuma saniatigut aamma KNAPK pitsaasumik paaseqatigiiffiusumillu ataatsimeeqatigivara silap pissusaata allanngornerata kingunerisaanik piniartut inuussutissarsiumminnik ingerlatsisinnaajunnaaqqasut pillugit, taamaammat aamma taakkununnga tunngatillugu kattuffiat paaseqatigalugu qinnuteqaat ilusiligaavoq, aningaasaqarnermut naalakkersuisoq Erik Jensen Sermitsiaq.AG-mut oqarpoq.
Aningaasaqarnermut ataatsimiititaliaq immikkut ittumik ataatsimiissaaq
Inatsisartut aningaasaqarnermut ataatsimiititaliaata siulittaasua, Asii Chemnitz Narup (IA), Sermitsiaq.AG-mut uppernarsaavoq ataatsimiitaliaq pinasuartumik immikkullu ittumik ataatsimiissasoq sisamanngornermi nalunaaqutaq 13:00, ataatsimiissutissarlu tassatuaassasoq isertitakinnerusunut aningaasarliornerup eqqornerluinera tunngavigalugu ikiorsiissutissanik aammalu piniartunut ilaqutaannullu, silap pissusaata allanngornerata malitsigisaanik eqqornerlugaasunut ikiorsiissutissanik Naalakkersuisut qinnuteqaatigisaata aalajangiiffigineqarnissaa.
- Aningaasanut inatsisissaq pillugu partiit isumaqatigiissusiortut eqqumaffigaat aningaasat naleerukkiartornerisa kingunerisaanik ajornartoorneq pissutaalluni immikkut iliuuseqartoqartariaqalersinnaasoq, taamaammat aningaasaqarnermut ataatsimiititaliamit sillimaffigereerparput Naalakkersuisut immikkut ittumik qinnuteqaammik apuussisariaqalersinnaasut, tamannalu maanna pivoq, uagullu sapinngisarput tamaat atorlugu aalajangernissarput sukkasuumik suliarissavarput, Asii Chemnitz Narup (IA) oqarpoq nangillunilu:
- Neriuutigaara naatsorsuutigalugulu Naalakkersuisut aqagu akissuteqarfigisinnaassallutigit, aamma neriuutigaara pisariaqassanngitsoq qinnuteqaat tunngavigalugu itisiliissutaasussanik apersuisariaqassannginnerput aammalu suliamut tunngatillugu siunersiueqqinnissarput pisariaqassanngitsoq, tassami nalunngilarput aalajangertoqarnissaa pinartuusoq, aningaasaqarnermut ataatsimiititaliap siulittaasua, Asii Chemnitz Narup erseqqissaavoq.
Maannamut iluatsinngilarput ikiorsiissutit pineqartut qanoq katitigaanersut sukumiisumik paasisaqarfigissallugu, tassa Qaanaami nunaqarfittaanilu piniartut inuussutissarsiutiminnik ingerlatsinaveeqqasunut aammalu isertitakinnerusunut ataatsimoortumik qanoq ikiorsiisoqassanersoq pillugu paasisaqarnissarput aningaasaqarnermut ataatsimiititaliap suliarinnereernissaa aalajangernissaalu pereerpat ikiorsiineq qanoq iluseqassanersoq tamanut paasissutissiissutigineqartussaammat.